સંઘપ્રદેશમાં ખાલી પડેલ જિ.પં. અને ગ્રા.પં.ની બેઠકો માટેની પેટા ચૂંટણી 17મી ઓક્‍ટોબરે યોજાશે

દીવ જિ.પં.ના વોર્ડ નં.6/8 બુચરવાડા-એની બેઠક અને દાનહમાં કૌંચા ગ્રા.પં.ની વોર્ડ નં.6/8 અને ગલોન્‍ડા ગ્રા.પં.ની વોર્ડ નં.3/11ની બેઠક માટે થનારી પેટા ચૂંટણી
પેટાઃ
વિજેતા ઉમેદવારોના નિધનથી ખાલી પડેલી બેઠકો
(વર્તમાન પ્રવાહ ન્‍યુઝ નેટવર્ક)
દમણ, તા. 21
સંઘપ્રદેશ દાદરા નગર હવેલી અને દમણ-દીવમાં ખાલી પડેલ જિલ્લા અને ગ્રામ પંચાયતના સભ્‍યોની બેઠક માટેની પેટા ચૂંટણી 17મી ઓક્‍ટોબરના રોજ નિર્ધારિત કરવામાં આવી છે.
દાદરાનગર હવેલી ખાતે કૌંચા ગ્રામ પંચાયતના વોર્ડ નં.6/8માં શ્રી રમેશભાઈ ધવજીભાઈ દોડિયા અને ગલોન્‍ડા ગ્રામ પંચાયતના વોર્ડ નં.3/11માં શૈલેષભાઈ રમેશભાઈ પટેલનું નિધન થતાં આ બેઠકો ખાલી પડી હતી.
જ્‍યારે દીવ જિલ્લા પંચાયતમાં વોર્ડ નં.6/8 બુચરવાડા-એની બેઠક ઉપર ચૂંટાયેલા શ્રીમતી શાંતાબેન મનજીનું અવસાન થતાં આ બેઠક ખાલી પડી હતી.
પેટા ચૂંટણીના જાહેર થયેલા સમયપત્રક પ્રમાણે ઉમેદવારી પત્રક ભરવાની છેલ્લી તારીખ 28મી સપ્‍ટેમ્‍બર- 2021, ઉમેદવારી પત્રકની ચકાસણી 29મી સપ્‍ટેમ્‍બર અને ઉમેદવારી પત્રક ખેંચવાની અંતિમ તારીખ 1લી ઓક્‍ટોબર-2021ના બપોરના 3:00 વાગ્‍યા સુધી રહેશે. આ પેટા ચૂંટણી તા.17મી ઓક્‍ટોબર-2021ના રવિવારે સવારે 8 વાગ્‍યાથી સાંજે 5:00 વાગ્‍યા સુધી યોજાવાની હોવાનું ચૂંટણી કમિશનર શ્રી નરેન્‍દ્ર કુમારની અખબારી યાદીમાં જણાવાયું છે.