અકલ્પનીય પડેલા માવઠાને લઈ સામાન્ય જનજીવન પ્રભાવિત થયું
(વર્તમાન પ્રવાહ વાપી બ્યુરો)
વાપી, તા.18
છેલ્લા બે દિવસથી વલસાડ જિલ્લામાં વાદળછાયા વાતાવરણ મધ્યે આજે વાપી સહિત ધરમપુર-કપરાડા વિસ્તારમાં કમોસમી વરસાદ પડયો હતો.
વલસાડ જિલ્લામાં કમોસમી વરસાદ પડતા ખેડૂતોમાં ચિંતા ફેલાઈ હતી. શિયાળુ પાકને નુકશાન થવાની ભીતિ સેવાઈ રહી છે. વાદળછાયા વાતાવરણમાં પલટો આવવાનું કારણ છેલ્લા બે દિવસથી બંગાળ ઉપસાગરમાં દબાણ વધતા કમોસમી વરસાદ પડયો છે. આ વરસાદ ગુજરાતના અન્ય વિસ્તારમાં પડયો છે. સવારે ગરમી બાદ વાપીમાં બપોર પછી અચાનક વરસાદ પડતા રોડ ઉપર હરતા ફરતા વાહન ચાલકોએ પુલ કે દુકાનના છાપરા-છત નીચે છુપાઈ વરસાદનો પ્રતિકાર કરવો પડયો હતો. વાદળછાયા વાતાવરણ અને વરસાદને લઈ અમુક લોકો અભડાઈએ ચઢાવેલા રેઈનકોટ બહાર કાઢીને બહાર નિકળેલા જોવા મળતા હતા તો કેટલાક લોકો છત્રી લઈને પણ નિકળ્યા હતા. વલસાડ જિલ્લા સાથે પડોશી સંઘપ્રદેશ દાનહ અને દમણમાં ભારે વરસાદી ઝાપટા પડયા હતા. અચાનક અકલ્પનીય માવઠાને લઈ સામાન્ય જનજીવન પ્રભાવિત થયું હતું.
