વલસાડઃ ૩૧: રમતગમત, યુવા અને સાંસ્કૃતિક પ્રવૃત્તિઓ વિભાગ હસ્તકની કમિશ્નરશ્રી યુવક સેવા અને સાંસ્કૃત્તિક પ્રવૃતિઓની કચેરી, ગાંધીનગર તથા જિલ્લા રમત ગમત કચેરી દ્વારા સંયુક્ત રીતે યુવા ઉત્સવ ૨૦૨૧-૨૨ નું જિલ્લા કક્ષાએ આયોજન કરવામાં આવ્યું હતું. જેમાં ૧૫ થી ૨૯ વર્ષ વયજૂથ પ્રમાણે કલાકારોએ ભાગ લીધો હતો. જિલ્લા કક્ષાએ વિજેતા થયેલ કલાકારોની કૃતિ પ્રદેશ કક્ષાએ મોકલવામાં આવી હતી. પ્રદેશ કક્ષાએ પ્રથમ તથા દ્વિતીય ક્રમાંકે વિજેતા થયેલ કલાકારો એ રાજ્યકક્ષા યુવા ઉત્સવ ૨૦૨૧-૨૨ માં ભાગ લીધો હતો. જેમાં રાજ્યકક્ષાએ વાંસળી, લોકગીત તથા લોકનૃત્ય સ્પર્ધા વડોદરા ખાતે યોજાયેલ હતી. તેમાં વાંસળી સ્પર્ધામાં ઝીલ સુબોધકુમાર પટેલ અને લોકગીત સ્પર્ધામાં મનિષા બચુભાઇ વસાવાએ પ્રથમ ક્રમાંક પ્રાપ્ત કર્યો છે. જ્યારે લોકનૃત્ય સ્પર્ધામાં ઇ.એમ.આર.એસ. કપરાડા સ્કૂલે તૃતિય ક્રમાંક પ્રાપ્ત કર્યો છે. રાજ્યકક્ષા વક્તૃત્વ, લોકવાદ્ય સંગીત, એકપાત્રીય અભિનય, ભજન તથા સમૂહગીતની સ્પર્ધા બનાસકાંઠા ખાતે યોજાઇ હતી. જે પૈકી વક્તૃત્વ સ્પર્ધામાં ભક્તિ હિરેન શાહ, લોકવાદ્ય સંગીત સ્પર્ધામાં અજય રમણભાઇ વસાવા, એકપાત્રીય અભિનય સ્પર્ધામાં ખુશ્બુ ઉમેશભાઇ મહેતા, તેમજ ભજન સ્પર્ધામાં મનિષા બચુભાઇ વસાવાએ પ્રથમ ક્રમાંક પ્રાપ્ત કર્યો છે. જ્યારે સમૂહગીત સ્પર્ધામાં કલ્યાણી સ્કુલ, અતુલે તૃતિય ક્રમાંક પ્રાપ્ત કર્યો છે. આ તમામ વિજેતા કલાકારોએ વલસાડ જિલ્લાને રાજ્ય કક્ષાએ ગૌરવ અપાવ્યું છે. તે બદલ વલસાડ જિલ્લા રમત ગમત કચેરીના જિલ્લા યુવા વિકાસ અધિકારી તેમજ જિલ્લા રમત ગમત અધિકારી તેઓને અભિનંદન પાઠવ્યા છે.
