ખાતાકીય તપાસ એસ.ટી.નિયામક દિલીપકુમાર વી. ચૌધરી ચલાવી રહ્યા હતા : કર્મચારી પાસે પતાવટ અંગે 10 હજારની લાંચ માંગી હતી
(વર્તમાન પ્રવાહ વાપી બ્યુરો)
વાપી, તા.06
વલસાડ એસ.ટી. ડિવીઝન કન્ટ્રોલર વિભાગીય નિયામક અધિકારી આજે વિભાગીય ડી.સી.ચેમ્બરમાં એક કર્મચારી પાસે ખાતાકીય તપાસ અંગે પતાવટ કરવા માટે રૂા. 10 હજારની લાંચ લેતા રંગે હાથે એ.સી.બી.ના હાથે ઝડપાઈ જતા એસ.ટી.વર્તુળોમાં ચકચાર મચી જવા પામી હતી.
વલસાડ એસ.ટી. ડિવિઝનમાં ફરજ બજાવતા એક કર્મચાર ઉપર કેસ થયો હતો. જેની ખાતાકીય તપાસ વિભાગીય એસ.ટી. નિયામક દિલીપકુમાર વાઘજીભાઈ ચૌધરી ચલાવી રહ્યા હતા.આ કેસની પતાવટ માટે અધિકારીએ રૂા. 10 હજારની લાંચ કર્મચારી પાસે માંગી હતી. જે આપવા તે તૈયાર નહોતો તેથી જાગૃત કર્મચારીએ એ.સી.બી.માં ફરિયાદ નોંધાવી હતી. અધિકારીએ ફરીયાદીના પાંચ હજાર અને સહ કર્મચારીના પ હજાર મળી કુલ 10 હજાર માંગ્યા હતા. તેથી એ.સી.બી.એ ફરિયાદ બાદ ડી.સી.ચેમ્બર એસ.ટી. વલસાડમાં કર્મચારી પાસે રૂા. 10 હજારની લાચ લેતા એ.સી.બી.એ છટકુગોઠવીને નિયામક દિલીપકુમાર ચૌધરીને રંગે હાથે ઝડપી લીધા હતા. નિયામક લાંચ લેતા ઝડપાઈ જતા એસ.ટી. વર્તુળોમાં ચકચાર મચી જવા પામી હતી.
