ઘેલવાડ ગ્રામ પંચાયતના સરપંચ હિતાક્ષીબેન પટેલ, સોમનાથના ચૈતાલીબેન કામલી, દાભેલના હેમાક્ષીબેન પટેલ અને આટિયાવાડ પંચાયતના સરપંચ અમિત પટેલે દમણના 4 જાગૃત પત્રકારો દ્વારા વિદ્યુત વિભાગના ખાનગીકરણને રોકવા માટે બનાવેલ સમિતિને આપેલું પોતાનું સમર્થન પત્ર
(વર્તમાન પ્રવાહ ન્યુઝ નેટવર્ક)
દમણ, તા.10
દમણ જિલ્લાની ઘેલવાડ ગ્રામ પંચાયત, સોમનાથ, દાભેલ અને આટિયાવાડ ગ્રામ પંચાયતોના સરપંચોએ દમણના 4 જાગૃત પત્રકારો દ્વારા વિદ્યુત વિભાગના ખાનગીકરણને રોકવા ગઠિત સમિતિને આજે પોતાનું સમર્થન પત્ર સુપ્રત કર્યું હતું.
દમણની ઘેલવાડ ગ્રામ પંચાયતના સરપંચ શ્રીમતી હિતાક્ષીબેન પટેલ, સોમનાથ ગ્રામ પંચાયતના સરપંચ શ્રીમતી ચૈતાલીબેન કામલી, દાભેલ ગ્રામ પંચાયતના સરપંચ શ્રીમતીહેમાક્ષીબેન પટેલ અને આટિયાવાડ ગ્રામ પંચાયતના સરપંચ શ્રી અમિત પટેલે પોતપોતાની પંચાયતની જનતા વતી ભારત સરકારને નફો રળતા વિદ્યુત વિભાગના ખાનગીકરણના નિર્ણય ઉપર પુનઃ વિચાર કરવા અપીલ કરી છે અને દમણના 4 પત્રકારો દ્વારા ખાનગીકરણને રોકવા શરૂ કરાયેલા અભિયાનને સમર્થન આપતો પત્ર પણ સુપ્રત કર્યો હતો.
ગઈકાલે મોટી દમણની ત્રણ પંચાયતોએ જાહેર કરેલા પોતાના સમર્થન બાદ આજે બીજી 4 પંચાયતો પણ જોડાતા દમણ જિલ્લાની 7 પંચાયતોએ ભારત સરકારને વિદ્યુત વિભાગના ખાનગીકરણના નિર્ણયની પુનઃ વિચારણા કરવા અપીલ કરી છે.
