(વર્તમાન પ્રવાહ ન્યુઝ નેટવર્ક) પારડી, તા.10
પારડી પાલિકાએ નાણાકીય વર્ષનાં અંતિમ તબક્કામાં વેરાની આકરી વસૂલાત માટે કમર કસી છે. જેમાં નગરપાલિકાની એક વિશેષ ટીમ બનાવી બાકીદારોને નોટિસ ફટકારવાની સાથે સાથે મિલકતો પર સીલ મારવાની ગતિવિધિ પણ હાથ ધરતા શહેરમાં ફફડાટ ફેલાઈ જવા પામ્યો છે.
પારડી નગરપાલિકા નાણાકીય વર્ષ આગામી માર્ચમાં પૂર્ણ થવાનું છે ત્યારે માર્ચ એન્ડિંગ સુધીમાં નગરપાલિકાએ જુદા જુદા વેરાની વસૂલાતનો ટાર્ગેટ પૂરો કરવા માટે અત્યારથી કમર કસી લીધી છે. છેલ્લા ત્રણ-ચાર વર્ષથી વેરા બાકીદારો પાસેથી કડક હાથે કામગીરી લેવાનું શરૂ કર્યું છે. બાકીદારોને પાલિકાએ નોટિસ ઈસ્યુ કરવા સહિતની કાર્યવાહી કરી છે. અનેપાલિકામાં વેરાવસુલાત માટે તૈયાર કરેલી ટિમમાં કિશોરભાઈ પરમાર, નીતિનભાઈ ચૌબલ સહિતના કર્મચારી છેલ્લા બે દિવસથી બાકીદારોને ત્યાં પહોંચી સીલ મારવા જેવી કાર્યવાહી કરતાં શહેરમાં ફફડાટ ફેલાઈ જવા પામ્યો છે. બે દિવસમાં પારડી પાલિકાએ પાર્થ રેસિડેન્સીમાં એક ફ્લેટ, સિલ્વર પેલેસમાં ત્રણ ફ્લેટ, શ્રી એપાર્ટમેન્ટમાં એક ફ્લેટ, સ્ટેટ બેન્કની ગલીમાં આઈસ્ક્રીમની શોપ, પંચરત્ન બિલ્ડિંગમાં બે ફ્લેટમાં સિલ મારવા જેવી કાર્યવાહી કરતા બાકીદારોમાં ફફડાટ ફેલાયો છે. ત્યારે બાકીદારોને સમયસર પાલિકામાં વેરા ભરવા માટે પાલિકા અપીલ કરી રહી છે.
