(વર્તમાન પ્રવાહ ન્યુઝ નેટવર્ક) દમણ, તા.27
આવતી કાલથી ધો.10 અને 1રની ગુજરાત બોર્ડની પરીક્ષા દાદરા નગર હવેલી અને દમણ-દીવમાં શરૂ થઈ રહી છે. કોરોના બાદ પહેલી વખત દમણના ધો.10 અને 1રના કુલ 3532 વિદ્યાર્થીઓ પરીક્ષા આપશે.
દમણ ખાતે ધો.10નું પરીક્ષા કેન્દ્ર સાર્વજનિક વિદ્યાલય-નાની દમણ, શ્રી માછી મહાજન અંગ્રેજી માધ્યમ શાળા-નાની દમણ, ઈન્સ્ટિયુટ ઓફ અવર લેડી ઓફ ફાતિમા-મોટી દમણ અને સરકારી ઉચ્ચતર માધ્યમિક શાળા-મોટી દમણ ખાતે આવેલ છે. જ્યારે ધો.1ર સામાન્ય પ્રવાહના વિદ્યાર્થીઓ માટે શ્રી માછી મહાજન અંગ્રેજી માધ્યમ શાળા-નાની દમણ અને ધો.1રના વિજ્ઞાન પ્રવાહ માટે સરકારી ઉચ્ચતર માધ્યમિક શાળા-ભીમપોર ખાતે નિયત કરાયેલછે.
કોરોનાકાળ બાદ પહેલી વખત ધો.10 અને 1રની યોજાઈ રહેલી પરીક્ષામાં પ્રશાસન દ્વારા પણ અગમચેતીના અનેક પગલા લેવામાં આવી રહ્યા છે. વિદ્યાર્થીઓને કોઈ તકલીફ નહી પડે અને શાંતિથી પરીક્ષા આપી શકે તે પ્રકારની વ્યવસ્થા શાળા સંચાલકો દ્વારા પણ કરવામાં આવી છે. સમગ્ર પરિસ્થિતિ ઉપર સંઘપ્રદેશના શિક્ષણ સચિવ શ્રીમતી અંકિતા આનંદના માર્ગદર્શન હેઠળ સહાયક શિક્ષણ નિર્દેશક શ્રી મણિલાલ પટેલ અને તેમની ટીમ ખડે પગે તૈયાર છે.