એસીબીને જોઈ જતા જવાન પ્રતિક પટેલ લાંચ લઈ ભાગી બે મહિનાથી નાસતો ફરતો હતો
(વર્તમાન પ્રવાહ વાપી બ્યુરો)
વાપી, તા.23: વલસાડ ગુંદલાવ જી.આઈ.ડી.સી.માં દારૂનો ધંધો ચાલુ રાખવા માટે જી.આર.ડી. જવાને રૂા.1 હજારની લાંચ માંગી હતી. ગત તા.07 સપ્ટેમ્બરના રોજ ફરિયાદ બાદ એ.સી.બી.એ છટકું ગોઠવ્યું હતું ત્યારે રૂપિયા 1 હજારની લાંચ સ્વિકારી આરોપી એ.સી.બી.ને જોઈ જતા બાઈક ઉપર ફરાર થઈ ગયો હતો. એ.સી.બી. આરોપીને બે મહિનાથી શોધતી હતી. અંતે આરોપી ઝડપાતા એ.સી.બી.એ કોર્ટમાં રજૂ કર્યો હતો.
બનાવની વિગતો મુજબ વલસાડ રૂરલ પોલીસમાં જી.આર.ડી. તરીકે ફરજ બજાવતા પ્રતિક પટેલએ દારૂના બુટલેગર પાસે ધંધો ચાલુ રાખવા માટે બે હજાર માંગ્યા હતા. અંતે એક હજાર નક્કી થયા હતા. ફરિયાદી લાંચ આપવા માંગતો નહોતો તેથી એ.સી.બી.માં ફરિયાદ કરી હતી. તે મુજબ એસીબીએ ગત તા.07 સપ્ટેમ્બરના રોજ ગુંદલાવ જુની જીઆઈડીસી પ્લોટ નં.5 સામેછટકું ગોઠવ્યું હતું. ફરિયાદીએ પ્રતિકને આ સ્થળે રૂપિયા લેવા આવવા જણાવેલ તેથી જી.આર.ડી. જવાન પ્રતિક પટેલે સ્થળ ઉપર રૂા.1 હજારની લાંચ સ્વિકારી હતી. પરંતુ એ.સી.બી.ને જોઈ જતા બાઈક ઉપર ફરાર થઈ ગયો હતો. અંતે બે મહિના બાદ એ.સી.બી.એ પ્રતિક પટેલને ઝડપી પાડયો હતો.
