રામસેતુ બીચ રોડ ઉપર વાહનોના ઓવરટેકિંગ ઉપર પણ પ્રતિબંધ મુકવો આવશ્યક
ફોટો -રાહુલ ધોડી
(વર્તમાન પ્રવાહ ન્યુઝ નેટવર્ક) દમણ, તા.03
મોટી દમણ લાઈટ હાઉસથી જમ્પોર બીચ સુધીના બનેલા રામસેતુ બીચ રોડ ઉપર વાહનોની ગતિ નિર્ધારીત કરવી ખુબ જરૂરી બની ગયું છે. કારણ કે, રામસેતુ બીચ ઉપર વાહન ચાલકો પુરપાટ સ્પીડે પોતાના વાહનને હંકારતા હોવાથી પ્રવાસીઓને અકસ્માતની ભીતિ રહે છે.
મોટી દમણ લાઈટ હાઉસથી જમ્પોરસુધીના બીચ રોડ ઉપર વાહનોના ઓવરટેકિંગ ઉપર પણ પ્રતિબંધ મુકવો જોઈએ. કારણ કે, ઓવરટેકિંગના કારણે આ બીચ રોડ ઉપર છાશવારે અકસ્માતની ઘટના પણ બનતી રહે છે. કેટલાક વાહન ચાલકો અને તેમા સવાર લોકો સ્ટન્ટ કરી પોતાના શરીરના ભાગને બહાર કાઢતા પણ નજરે પડે છે.
આજે દમણમાં રામસેતુ બીચ રોડ પ્રવાસીઓ માટે સૌથી મોટું આકર્ષણનું કેન્દ્ર હોવાની સાથે પ્રવાસીઓથી પણ ભરચક રહે છે. ત્યારે પ્રવાસીઓ અને સ્થાનિક લોકોની સુરક્ષા માટે પ્રશાસન આ રોડ ઉપર સ્પીડ મર્યાદા નિર્ધારીત કરી ઓવર ટેકિંગ ઉપર પણ પ્રતિબંધ લગાવે એવી આજના સમયની માંગ બની છે.
