શહેરના છીપવાડ અને મોગરાવાડીના બાયપાસમાં પાણી ભરાઈ ગયા
(વર્તમાન પ્રવાહ વાપી બ્યુરો)
વાપી, તા.02: ચાલુ વર્ષે પ્રકૃતિનું કેલેન્ડર બદલાઈ ગયું છે. ચોમાસા બાદ વલસાડ જિલ્લામાં શિયાળા અને ઉનાળામાં કમોસમી વરસાદ લગભગ ચાલુ જ રહ્યો છે. મંગળવારે સવારે વલસાડ વિસ્તારમાં માવઠુ થતાં શહેરના રસ્તાઓ ઉપર પાણી ભરાઈ ગયા હતા. ઉનાળામાં પણ સીમલા જેવી શીતળતા પ્રસરાઈ હતી.
વલસાડ વિસ્તારમાં કમોસમી વરસાદે મંગળવારેસવારે જ લોકોને મુંઝવણમાં મુકી દીધા હતા. અચાનક વાતાવરણ બદલાયા બાદ ક્યાંક ધોધમાર તો ક્યાંક ઝરમર વરસાદ પડયો હતો. પરિણામે સામાન્ય જનજીવન પ્રભાવિત બન્યું હતું. વલસાડ શહેરની સદાયની કમનસીબી રહી છે કે જ્યારે જ્યારે વરસાદ પડે ત્યારે છીપવાડ અને મોગરાવાડીનો અંડરપાસ પાણીમાં ગરકાવ થઈ જતો હોય છે. આજે પણ કમોસમી વરસાદથી અંડરપાસ નીચે પાણી ભરાઈ જતા વાહન ચાલકો મુશ્કેલીમાં મુકાયા હતા. બીજી તરફ કમોસમી વરસાદે ખેડૂતોના મોંમાં આવેલો કોળીયો છીનવી લીધો છે. કેરીનો ત્રીજો પાક પણ વરસાદ પડવાથી બગડી જવા પામ્યો છે.