આજેદમણવાડા ગ્રામ પંચાયત વિસ્તારના પ્રગતિશીલ ખેડૂતોને પોતાના ઘર આંગણે વર્મી કમ્પોસ્ટ બનાવવા માટે પંચાયત દ્વારા અપાનારી કમ્પોસ્ટ બેડ
(વર્તમાન પ્રવાહ ન્યુઝ નેટવર્ક) દમણ, તા.18 દમણવાડા ગ્રુપ ગ્રામ પંચાયત દ્વારા ગયા વર્ષે ‘તોક્તે’ વાવાઝોડાના કારણે ગ્રામ્ય રસ્તા ઉપર પડેલ પાંદડા, ડાખળીઓ તેમજ અન્ય કચરા-કુટામાંથી 19મી મે,ર0ર1ના રોજ વર્મી કમ્પોસ્ટ ખાતર બનાવવાનો આરંભ કર્યો હતો. જેને આવતી કાલે એક વર્ષ પૂર્ણ થઈ રહ્યું છે ત્યારે દમણવાડા ગ્રામ પંચાયત દ્વારા પંચાયત વિસ્તારના પ્રગતિશીલ ખેડૂતોને પોતાના ખેતરમાં વર્મી કમ્પોસ્ટ બનાવવા જરૂરી દિશાનિર્દેશ આપવા માટે આવતી કાલે પંચાયત કાર્યાલય ખાતે એક બેઠકનું પણ આયોજન કરવામાં આવ્યું છે.
દમણવાડા ગ્રામ પંચાયત દ્વારા પંચાયત વિસ્તારના કેટલાક પ્રગતિશીલ ખેડૂતોને વર્મી કમ્પોસ્ટ માટેની બેડ આપવામાં આવશે અને પંચાયત દ્વારા સમય સમય ઉપર જરૂરી દિશાનિર્દેશ સાથે વર્મી કમ્પોસ્ટના ઉત્પાદન માટે ખેડૂતોને પ્રેરિત પણ કરવામાં આવશે.
દમણવાડા ગ્રામ પંચાયતના સરપંચ શ્રી મુકેશ ગોસાવીના જણાવ્યા પ્રમાણે પોતાના ઘરનો નિકળતો એઠવાડ, શાકભાજી તથા ફળફળાદીનો કચરો તેમજ ઝાડના પાંદડા, કુટો, કચરો વગેરે વર્મી કમ્પોસ્ટ બેડમાં જમા કરી તેને ખાતરમાં રૂપાંતરીત કરવાપંચાયત દ્વારા અળસિયાની પણ વ્યવસ્થા કરવામાં આવશે. આ બાબતે યોગ્ય જાણકારી અને માર્ગદર્શન આપવા માટે દમણવાડા પંચાયત દ્વારા આવતી કાલે સવારે 11:00 વાગ્યે પંચાયત કાર્યાલય પર ખેડૂતો સાથે એક બેઠકનું આયોજન કરવામાં આવ્યું છે. જેમાં ઉપસ્થિત રહેવા પંચાયત વિસ્તારના તમામ ખેડૂતોને વિનંતી કરવામાં આવી છે.
