(વર્તમાન પ્રવાહ ન્યુઝ નેટવર્ક) સેલવાસ, તા.19
દાદરા નગર હવેલીના ખાનવેલ પોલીસ સ્ટેશનમાં કેદ એક ચોરીનો આરોપી બુધવારની રાતે પોલીસને ચકમો આપી ફરાર થઈ ગયો છે. પોલીસે આખી રાત શોધખોળ હાથ ધરી પરંતુ આરોપીનો કોઈ જ પતો લાગ્યો નથી.
સૂત્રો દ્વારા મળેલ માહિતી અનુસાર કૈલાશ લખમી દળવી ઉ.વ.22 રહેવાસી ઉદવા, દલવીપાડા જે થાણાની સેન્ટ્રલ જેલમા કેદ હતો જેને ચોરીના આરોપમા 18મે ના રોજ ટ્રાન્સફર વોરંટ પર ખાનવેલ પોલીસ સ્ટેશનમાં લાવવામા આવ્યો હતો. જે બુધવારે રાત્રે નવ વાગ્યે પાણી પીવાના બહાને કસ્ટડીની બહાર નીકળ્યો હતો અને પોલીસને ચકમો આપી ફરાર થઈ ગયો હતો. ફરાર આરોપીને શોધવા માટે નાકાબંધી કરવામા આવી હતી. પરંતુ આરોપી હજીસુધી પોલીસના હાથે ઝડપાયો નથી.