(વર્તમાન પ્રવાહ ન્યુઝ નેટવર્ક) સેલવાસ, તા.19
સંઘપ્રદેશ દાદરા નગર હવેલી અને દમણ દીવમાં છેલ્લા કેટલાક વર્ષોથી કેટલાક ખાનગી શાળા સંચાલકો દ્વારા શિક્ષણના નામે વેપાર કરી લુંટ ચલાવાઈ રહી છે. શિક્ષણ વિભાગની લાપરવાહી અને સાઠગાંઠ દ્વારા પ્રદેશની કેટલીક ખાનગી શાળાઓમાં વાલીઓને જબરદસ્તીથી પસંદગીની દુકાનોમાંથી અથવા તો શાળામાંથી જ પુસ્તકો, નોટબુકો, શિક્ષણ સામગ્રી તેઓની મરજીના ભાવે ખરીદી કરવા માટે દબાણ કરવામાં આવી રહ્યું છે. કેટલીક ખાનગી શાળાઓમાંથી વિદ્યાર્થીઓ માટેના સ્કૂલ ગણવેશ, બૂટ, મોજાં, સ્કૂલબેગ, ટેક્સબુક, નોટબુક સહિત અન્ય ચીજવસ્તુ શાળા સંચાલકો દ્વારા નક્કી કરવામાં આવેલ ભાવોથી જ ખરીદવા માટે મજબુર કરાઈ રહ્યા હોવાની માહિતી મળી રહી છે.
પ્રદેશની ખાનગી શાળા સંચાલકોએ પોતાના હિસાબે જ બનાવ્યા છે શિક્ષણના કાયદા
પ્રદેશની વધુમાં વધુ ખાનગી શાળા સંચાલકોએ શિક્ષણના નામ પર પોતાની દુકાનો ચલાવતા પોતપોતાના હિસાબે શિક્ષણ ગ્રહણ કરવાના નિયમોઅને કાયદા બનાવ્યા છે. જાણે કે, એમના ઉપર સંઘપ્રદેશનું શિક્ષણ વિભાગ મહેરબાન છે, આ હકીકત છે કે એકલ દોકલ ખાનગી શાળા છોડી દરેક શાળાઓ પોતપોતાના નીતિ-નિયમ પ્રમાણે શિક્ષણ વ્યવસ્થાના નામ પર કાયદા બનાવ્યા છે અને એજ કાયદાનું પાલન કરવા માટે વાલીઓ પર દબાણ કરવામાં આવે છે. કેટલીક શાળાઓએ કોરોના મહામારી સમયે પણ પોતાની મનમાની ચલાવી વાલીઓના ઘાવ ઉપર મીઠું(નમક) ભભરાવ્યું છે.
