(વર્તમાન પ્રવાહ ન્યુઝ નેટવર્ક) પારડી, તા.04
પારડી તાલુકાના ઉમરસાડી માછીવાડ ખાતે બાવરી ફળીયા ખાતે રહેતા ગીરીશભાઈ આહીરને ત્યાં મજૂરી કરતા મહેશ ઉર્ફે સંતોષ રામશીગ રાઠવા એ થોડા સમય પહેલા બાજુમાં રહેતા જસવંતભાઈપાસે બે હજાર રૂપિયા ઉછીના લીધા હતા.
જસવંતભાઈ એ તા.1લી જુલાઈના રોજ આ ઉછીના પૈસાની ઉઘરાણી કરતા મહેશ ઉર્ફે સંતોષે ઉશ્કેરાઈ જઈ તારા પૈસા નથી આપવાનો કહી જસવંતભાઈને માથામાં લાકડાના ફટકા મારી ગંભીર ઈજા પહોંચાડી પોતાના વતન છોટા ઉદયપુર ભાગી ગયો હતો.
બીજી તરફ ગંભીર રીતે ઈજા પામેલ જસવંતભાઈનુ સારવાર દરમ્યાન 3જી જુલાઈના રોજ મૃત્યુ થતા પારડી પોલિસે પ્રથમ 307 અને ત્યારબાદ 302 ની કલમ ઉમેરી આરોપીને પકડવાના ચક્રો ગતિમાન કર્યા હતા. પારડી પોલીસ સ્ટેશન ના પી.એસ.આઈ.જે.એન. સોલંકીએ આધુનિક ઉપકરણો તથા મોબાઈલના આધારે ભાગી ગયેલ આરોપી છોટા ઉદયપુરમાં હોવાનું બહાર આવતા તેમણે એક ટીમ પારડીથી છોટા ઉદયપુર રવાના કરી ત્યાંથી આ આરોપીની ધરપકડ કરી પારડી ખાતે લાવવામાં આવ્યો હતો. આમ પારડી પોલિસના પી.એસ આઈ. જે.એન.સોલંકીએ ફક્ત એક જ દિવસમાં મર્ડર જેવા આરોપીને ઝડપી મોટી સફળતા મેળવી છે.