જિલ્લા પોલીસ વડા વિજય ગુર્જરને હસ્તે કોલેજના પ્રતિભાશાળી વિદ્યાર્થીઓને ટ્રોફીથી પુરસ્કૃત કરાયા
(વર્તમાન પ્રવાહ વાપી બ્યુરો)
વાપી, તા.29
વાપીની જાણીતી રોફેલ બી.બી.એ., બી.સી.એ. કોલેજનો વાર્ષિકોત્સવ ‘‘પ્રોત્સાહન 2023” વી.આઈ.એ. ઓડિટોરિયમમાં દબદબા પૂર્વક ઉજવણી કરવામાં આવી હતી.
રોફેલ કોલેજના વાર્ષિકોત્સવમાં મુખ્ય અતિથિ તરીકે જિલ્લા પોલીસ વડા વિજય ગુર્જર ઉપસ્થિત રહ્યા હતા. તેઓની ઉપસ્થિતિ મધ્યે કોલેજ ટ્રસ્ટી હેમાંગ નાયક, પ્રિન્સિપાલ ડો.પ્રિયકાન્ત વેદ સહિત અતિથિઓ દીપ પ્રાગટય કરીને વાર્ષિકોત્સવ ‘‘પ્રોત્સાહન 2023” નો શુભારંભ કરાવ્યો હતો. વિદ્યાર્થીઓના વ્યક્તિત્વ વિકાસ માટે કોલેજમાં અભ્યાસ સાથે ઈતર પ્રવૃત્તિઓ સતત કાર્યરત રહે છે. ખાસ કરીને સ્પોર્ટ્સ, ડ્રોઈંગ, નાટક અભિનય, ક્વીઝ, વકૃત્વ સ્પર્ધામાં કોલેજના વિદ્યાર્થીઓએ ઉત્સાહભેર ભાગ લઈને પોતાની પ્રતિભા વારંવાર ઉજાગર કરતા રહ્યા છે તેવી વિશિષ્ઠ વિદ્યાર્થીપ્રતિભાઓને એસ.પી. વિજય ગુર્જરને હસ્તે ટ્રોફી આપી સન્માનિત કરવામાં આવ્યા હતા. આ પ્રસંગે એસ.પી.એ. તેમના જીવનમાં મળેલી નિષ્ફળતાઓ બાદ કેવી રીતે આઈ.પી.એસ. બન્યા તેમની પ્રેરક સંઘર્ષ કથા વિદ્યાર્થીઓ સમક્ષ તેમના પ્રવચનમાં વર્ણવી હતી.