એલ.સી.બી.એ 5 કાર, બાઈક, બુલેટ, 25 લીટર દારૂ સાથે 36 લાખનો મુદ્દામાલ જપ્ત કર્યો
(વર્તમાન પ્રવાહ વાપી બ્યુરો) વાપી, તા.04
વલસાડ નજીક આવેલ કાંજણહરી ગામમાં રવિવારે મોડી રાત્રે એલ.સી.બી.એ રેડ પાડી હતી. શરાબ-કબાબની ચાલી રહેલી મહેફીલમાં પોલીસે રંગમાં ભંગ પાડયો હતો. પોલીસ કાર્યવાહીમાં વલસાડ તાલુકા સરપંચ સંઘના પ્રમુખ, ઉપસરપંચ-વોર્ડ સભ્યો, બિલ્ડર અને રાજકીય અગ્રણી મળી કુલ 41 લોકોની ધરપકડકરતા સનસનાટી મચી જવા પામી હતી.
વલસાડ નજીક કાંજણહરી ગામે શબાબ-શરાબની મહેફીલ ચાલી રહી હોવાની બાતમી એલ.સી.બી. પી.આઈ. જે.એન. ગોસ્વામી અને પી.એસ.આઈ પનારા મળતા રવિવારે રાત્રે એક બંગલામાં પોલીસ ચુસ્ત તૈયારીઓ સાથે ત્રાટકી હતી. રેડમાં વલસાડ તાલુકા સરપંચ સંઘના પ્રમુખ વિનોદભાઈ પટેલ, સરપંચ નનકવાડા ડે સરપંચ, એક સગીર મળી કુલ 41 જેટલા ઈસમો દારૂ-કબાબની મોજમસ્તી માણતા પોલીસના હાથે ઝડપાઈ ગયા હતા. પોલીસે ઘટના સ્થળેથી 25 લીટર દારૂ, પાંચ આલીશાન કાર, બુલેટ, બાઈક મળીને 36 લાખનો મુદ્દામાલ કબજે કર્યો હતો. તમામ 41 આરોપીઓને મધરાત્રે પોલીસ બસમાં બેસાડી વલસાડ રૂરલ પોલીસ સ્ટેશને લાવીને કાયદેસરની કાર્યવાહી કરી હતી.