દીવ ન.પા.ની 13 બેઠકો પૈકી 6 ઉપર ભાજપનો બિનહરિફ વિજય થતાં માત્ર ઔપચારિક બની રહેલી ચૂંટણીઃ દીવ ન.પા.ની સ્થાપનાના 15 વર્ષ બાદ પહેલી વખત ભાજપનું શાસન નિશ્ચિત
(વર્તમાન પ્રવાહ ન્યુઝ નેટવર્ક) દીવ, તા.06
દીવ નગરપાલિકાના કુલ 7 વોર્ડ માટે આવતી કાલે યોજાનારી ચૂંટણીમાં કોઈ ઉત્સાહ દેખાતો નથી અને માત્ર ઔપચારિકતા પુરી કરવા માટે ચૂંટણી યોજાઈ રહી હોય એવું દીવના મતદારો અનુભવી રહ્યા છે.
દીવ નગરપાલિકાના કુલ 13 વોર્ડ પૈકી 6 વોર્ડમાં ભાજપનો બિનહરિફ વિજય થતાં હવે દીવ નગરપાલિકા ઉપર કબ્જો મેળવવા માટે માત્ર એક બેઠકની જરૂરિયાત છે અને યોજાઈ રહેલી 7 બેઠકો પૈકી મહત્તમ ઉપર ભાજપના ઉમેદવારો હોટ ફેવરિટ છે.
દીવ નગરપાલિકા સમરસ નહીં બને એ માટે કેટલાક વિઘ્નસંતોષીઓએઉમેદવારો ઉભા રાખ્યા છે. દીવ નગરપાલિકામાં પક્ષના પ્રતિક ઉપર ફક્ત ભાજપ જ લડી રહ્યો છે. જ્યારે કેટલાકને ભાજપની ટિકિટ નહીં મળતાં બળવો કરી ઉભા રહ્યા છે. પરંતુ દીવના લોકોનું વલણ ભાજપ તરફી હોવાના કારણે દીવ નગરપાલિકા ઉપર ભાજપનો ભગવો ફરકતા કોઈ રોકી નહીં શકે એ પ્રકારનો આત્મવિશ્વાસ વ્યક્ત થઈ રહ્યો છે.
દીવ નગરપાલિકામાં આવતી કાલે સવારે 8 વાગ્યાથી સાંજે 5 વાગ્યા સુધી મતદાન થશે અને મતની ગણતરી તા.9મી જુલાઈના રોજ નિયત કરવામાં આવેલ છે. દીવ જિલ્લામાં 9જુલાઈ સુધી દારૂબંધી અમલમાં રહેશે.