પાલિકા અને ભાજપના પ્રતિનિધિ મંડળે કેબિનેટ મંત્રી કનુભાઈ દેસાઈ સાથે ચર્ચા વિમર્શ કર્યો
(વર્તમાન પ્રવાહ વાપી બ્યુરો)
વાપી, તા.06: વાપી શહેરમાં છેલ્લા એક વર્ષથી વિકાસ કામોની રફતાર વધી રહી છે. શહેરના અનેક વિસ્તાર અને ક્ષેત્રમાં નોંધપાત્ર વિકાસ થઈ રહ્યોછે. ત્યારે હજુ વધુ વિકાસ થાય અને પાઈપ લાઈનમાં રહેલ વિકાસ યોજનાઓ ઝડપથી પુરી થાય એ માટે વાપી પાલિકાની ટીમ ગાંધીનગર પહોંચી હતી. જ્યાં કેબિનેટ મંત્રી શ્રી કનુભાઈ દેસાઈની સાથે મુલાકાત કરી વિકાસ કામોને વેગ આપવાની ચર્ચા વિચારણા અને રજૂઆત કરવામાં આવી હતી.
વાપી શહેરમાં હાલના વિકાસ કાર્યોમાં ખાસ જે ટાઈપ ઓવરબ્રિજ, અંડરબ્રિજ કેબલિંગ અને અન્ય વિકાસ કામો અંતર્ગત પાલિકાની ટીમ ગાંધીનગર પહોંચી હતી. જ્યાં કેબિનેટ નાણાં, ઊર્જા મંત્રી શ્રી કનુભાઈ દેસાઈની મુલાકાત લઈ રજૂઆત કરી હતી. મુલાકાત પ્રતિનિધિ મંડળમાં શહેર ભાજપ પ્રમુખ શ્રી સતિષભાઈ પટેલ, પાલિકા પ્રમુખ શ્રીમતી કાશ્મિરાબેન શાહ, કારોબારી ચેરમેન શ્રી મિતેશભાઈ દેસાઈ, ઉપપ્રમુખ અભયભાઈ શાહ, ચીફ ઓફિસર કલ્પેશભાઈ પટેલ અને રામચંદ્રભાઈ વગેરે જોડાયા હતા.