60 વર્ષથી વધુના લોકો, હેલ્થ કેર વર્કર અને ફ્રન્ટ લાઈન વર્કરને નિઃશૂલ્કમાં ડોઝ મુકાશે
વલસાડ તા. 8 જુલાઈ
કોવિડ વેક્સિનેશન અંતર્ગત બીજો ડોઝ અને પ્રિકોશન ડોઝ વચ્ચેનો સમયગાળો 9 મહિના (39 અઠવાડીયા) થી ઘટાડીને 6 મહિના (26 અઠવાડીયા) કરવામાં આવ્યો છે.
ભારત સરકારશ્રી દ્વારા તા.28 ડિસેમ્બર 2021થી સ્પેશિયલ કેટેગરી માટે પ્રિકોશન ડોઝ આપવાની શરૂઆત કરવામાં આવી છે. અગાઉ કેન્દ્ર સરકાર દ્વારા બીજા ડોઝના 9 મહિના બાદ પ્રિકોશન ડોઝ લેવાનું સૂચવવામાં આવ્યું હતું પરંતુ કેન્દ્ર સરકારની રસીકરણ કમીટી દ્વારા બીજા ડોઝ અને પ્રિકોશન ડોઝ વચ્ચેનો સમયગાળો 9 મહિના (39 અઠવાડીયા) થી ઘટાડીને 6 મહિના (26 અઠવાડીયા) કરવામાં આવ્યો છે, જે અન્વયે વલસાડ જિલ્લામાં 18–59 વર્ષની વયજૂથમાં પ્રિકોશન ડોઝ પ્રાઈવેટ કોવિડ વેક્સિનેશન સેન્ટર ખાતે બીજા ડોઝના 6 મહિના અથવા 26 અઠવાડીયા બાદ લઈ શકાશે. આ વેક્સિન સરકાર દ્વારા નિયત કરાયેલી કિંમતથી આપવામાં આવશે. જ્યારે 60 વર્ષથી વધુ વય જૂથના લાભાર્થીઓ, હેલ્થ કેર વર્કર તેમજ ફ્રન્ટ લાઇન વર્કરને બીજા ડોઝના 6 મહિના અથવા 26 અઠવાડીયા બાદ પ્રિકોશન ડોઝ ગવર્મેન્ટ કોવિડ વેક્સિનેશન સેન્ટર ખાતે નિઃશુલ્ક આપવામાં આવશે એવુ વલસાડ જિલ્લા આરોગ્ય અધિકારી દ્વારા અખબારી યાદીમાં જણાવાયું છે.