(વર્તમાન પ્રવાહ ન્યુઝ નેટવર્ક)
ચીખલી(વંકાલ), તા.13: ઉપરવાસમાં તેમજ નવસારી જિલ્લામાં પડેલા ભારે વરસાદને પગલે વાંસદા તાલુકામાં આવેલ જૂજ ડેમ અને કેલીયા ડેમ ઓવરફ્લો થયો છે. એક સાથે બન્ને ડેમો જૂજ ડેમ અને કેલીયા ડેમ ઓવરફ્લો થતા ધરતીપુત્રોને રાહત થવા પામી છે. બન્ને ડેમો ઓવરફ્લો થતા વાંસદા-ચીખલી અને ગણદેવી મળી 25 જેટલા ગામોને એલર્ટ કરાયા છે. જૂજ અને કેલીયા ડેમ ઓવરફ્લો થતા વાંસદા-ચીખલીના ધારાસભ્ય અનંત પટેલ તેમજ કેબિનેટ મંત્રી નરેશ પટેલ દ્વારા જૂજ અને કેલીયા ડેમ ખાતે પાણીના વધામણા કરવામાં આવ્યા હતા. જૂજ ડેમ કાવેરી નદી પર બન્યો હોય જેથી કાવેરી નદીમાં પૂર જેવી પરિસ્થિતિનું નિર્માણ થવા પામ્યું છે. તો કેલીયા ડેમ ઓવરફ્લો થતા ખરેરા નદીમાં ઘોડાપૂર જેવી પરિસ્થિતિનું નિર્માણ થયું છે.
