ભૂરકુંડ ફળીયા રિંગરોડ પર ટ્રક ખાડામાં પડતા રોંગ સાઈડ પર પહોંચી ગઈ
(વર્તમાન પ્રવાહ ન્યુઝ નેટવર્ક) સેલવાસ,તા.15
સંઘપ્રદેશ દાદરા નગર હવેલીમાં ચોવીસ કલાકમાં 11 ઈંચથી વધુ સાંબેલાધાર વરસાદ તૂટી પડયો હતો. ઉપરવાસમાં ભારે વરસાદને કારણે મધુબન ડેમમાં પાણીની આવક વધી રહી છે. ડેમના દસ દરવાજા ચાર મીટર ખોલવામાં આવ્યા છે. ભારે વરસાદ અને નદીઓમાં પાણી વધવાને કારણે નીચાણવાળા પુલો પર મોટા મોટા ખાડાઓ પડી ગયા છે સેલવાસના ભૂરકુંડ ફળીયા નજીક રીંગરોડ પર સવારે એક ટ્રક સામરવરણી તરફ જઈ રહ્યો હતો ત્યારે મોટા ખાડામાં ટ્રક પડતા ડિવાઈડર કુદાવી બીજી તરફ પહોંચી ગયો હતો જેના કારણે ટ્રકનું એક ટાયર પણ નીકળી ગયું હતું આ ઘટનામાં કોઈ ઈજા કે જાનહાની થયેલ નથી, પરંતુ રીંગરોડ પર પડેલ મોટામોટા ખાડાને કારણે વારંવાર આવા અકસ્માતો થતા રહે છે. ફલાંડી પટેલપાડા ખાતે ખનકી પર પુલ પરથી પાણીનું વહેણ વહેતા પુલ પર પણ મોટા મોટા ખાડાઓ પડી ગયા છે જેને કારણે વાહનચાલકોને તકલીફ પડી રહી છે. પીપરીયાના જૂના પુલ પર પણ સાઈડ તુટી ગયેલ છે. સેલવાસમાં 280 એમએમ 11.2 ઇંચ વરસાદ પડયો છે. જ્યારે સિઝનનો કુલ વરસાદ 1767 એમએમ 70.68 ઈંચ વરસાદ થયો છે. મધુબન ડેમનુંલેવલ સવારે 71.60 મીટર હતું અને ડેમમાં પાણીની આવક 90982 ક્યુસેક હતું. પાણીની જાવક 86531 ક્યુસેક અને સાંજે મધુબન ડેમનું લેવલ 72.15 મીટર ડેમમાં પાણીની આવક 116603 ક્યુસેક અને પાણીની જાવક 123187 ક્યુસેક છે.
ઉપરવાસમાં ભારે વરસાદને કારણે ડેમમાં વધુ પાણીની આવક થવાની સંભવનાને કારણે દમણગંગા નદી કિનારેના ગામના લોકોને સાવધાન રહેવા તાકીદ કરવામાં આવી છે. હવામાન વિભાગ દ્વારા દાનહમાં હજુ પણ ભારેથી અતિભારે વરસાદ પડવાની આગાહીના કારણે શાળા કોલેજોમાં રજા આપવામાં આવી છે.
