મહિલા કન્ડક્ટર દિપીકાબેન એચ. પટેલ બસમાંથી મળેલ થેલી ડેપોમાં જમા કરાવી
(વર્તમાન પ્રવાહ વાપી બ્યુરો)
વાપી, તા.21: વાપી એસ.ટી. ડેપોમાં ફરજ બજાવતી મહિલા બસ કન્ડક્ટરે પ્રમાણિકતાની મિશાલ ઉજાગર કરતી ઘટના પ્રકાશમાં આવી છે. ધરમપુર નાઈટ હોલ્ટ બાદ વાપી આવેલી બસમાં કન્ડક્ટરને એક થેલી મળી આવી હતી. આ થેલીમાં ચાંદીના ઘરેણા હોવા છતાં મહિલા કન્ડક્ટરે થેલી એસ.ટી. ડેપોમાં જમા કરાવી હતી. થેલી શોધતી આદિવાસી મહિલા કન્ટ્રોલમાં આવી હતી. જ્યાં તેની થેલી પરત કરાતા મહિલાના ચહેરા ઉપર સ્મિત ફેલાઈ ગયું હતું.
વાપી ડેપોમાંથી બસ નં.જીજે 18 ઝેડ 2886 બસમાં કન્ડક્ટર તરીકે દિપકાબેન એચ. પટેલ ફરજ ઉપર હતા. બસ ધરમપુર નાઈટ હોલ્ટ કરી આજે ગુરૂવારે વાપી ડેપોમાં પરત આવી હતી. કન્ડક્ટર દિપીકાબેનને બસમાંથી એક કપડાની થેલી મળેલી હતી. જે ઈમાનદારીપૂર્વક ડેપોમાં જમા કરાવી દીધેલ. બાદમાં પંચમહાલની જણાતી આદિવાસી મહિલા કન્ટ્રોલમાં ભુલેલી થેલી શોધવા આવી પહોંચેલી. તેથી વાપી ડેપોની કન્ડક્ટર દિપીકાબેનના હસ્તે ડેપો એ.ટી.આઈ. ધનસુખભાઈ પટેલની ઉપસ્થિતિમાં આદિવાસી મહિલાનીથેલી પરત કરાઈ હતી. થેલીમાં 15 હજાર ઉપરાંતની કિંમતના ચાંદીના સાંકળા હતા. થેલી પરત મળતા ગરીબ આદિવાસી મહિલાના મો ઉપર સ્મિત રેલાયુ હતું. વાપી ડેપોની મહિલા કન્ડક્ટર દિપીકાબેન (બેજ નં.6147)એ ઈમાનદારીની મિશાલ પુરી પાડી હતી.
