વલસાડઃ તા.૩૦: વલસાડ જિલ્લામાં ૩૩૪ ગ્રામ પંચાયતોનો સામાન્ય ચૂંટણી તા.૧૯/૧૨/૨૦૨૧ના રોજ યોજાનાર છે. આ ચૂંટણીના સરળ સંચાલન અને આચારસંહિતાના સંદર્ભમાં ચૂંટણીપંચના આદેશ અનુસાર વાહનોના દુર ઉપયોગ ઉપર નિયંત્રણ મૂકવા અને કાયદો વ્યવસ્થાની જાળવણીના હેતુસર જિલ્લા મેજિસ્ટ્રેટ ક્ષિપ્રા એસ.આગ્રેએ વલસાડ જિલ્લામાં નગરપાલિકા વિસ્તાર સિવાય જે ગ્રામ પંચાયતની ચૂંટણી યોજાનાર છે તે ગ્રામ પંચાયત વિસ્તારમાં મતદાનના દિવસે એટલે કે, તા.૧૯/૧૨/૨૦૨૧ અને જો પુનઃ મતદાન યોજવાનું થાય તો તા.૨૦/૧૨/૨૦૨૧ના રોજ વાહનોના ઉપયોગ ઉપર નિયંત્રણો ફરમાવ્યા છે.
જે અનુસાર મતદાનના દિવસે ઉમેદવાર પોતાના ઉપયોગ માટે એક વાહન તથા મતદાર વિભાગમાં ચૂંટણી એજન્ટ અથવા તેના કાર્યકરો અથવા પક્ષીય કાર્યકરો માટે ચૂંટણી અધિકારી દ્વારા અપાયેલી પરમીટ ધારણ કરેલી એ જ વાહન વાપરી શકાશે અને વાહન ઉપર પરમીટ નંબર ફરજિયાત પ્રદર્શિત કરવાનો રહેશે. આ પ્રતિબંધ સરકારી અધિકારીઓ કે જે ચૂંટણી પ્રક્રિયામાં સંકળાયેલા છે, તેઓને લાગુ પડશે નહીં. આ વાહનમાં ઉમેદવાર/ મતદાન એજન્ટ/ પક્ષીય કાર્યકરો મતદારોને લાવવા- લઇ જવા માટે- અસામાજિક તત્ત્વોની હેરફેર માટે- ગેરકાયદેસર હથિયારોની હેરફેર માટે કરી શકશે નહીં. કોઇપણ વ્યકિત પોતાના કોઇપણ પ્રકારના વાહનોમાં મતદારોની હેર-ફેર કે તેવા હેતુસર વાહનનો ઉપયોગ કરી શકશે નહીં, પરંતુ વાહનનો પોતાના અને ફકત કુટુંબના વ્યકિતઓ પૂરતો મર્યાદિત ઉપયોગ કરી શકશે. આ હુકમનું ઉલ્લંઘન દંડ સંહિતાની કલમ-૧૮૮ હેઠળ કાયદેસરની કાર્યવાહીને પાત્ર ઠરશે.
