નાનાપોંઢાના પી.એસ.આઈ., ત્રણ કોન્સ્ટેબલ સહિત 19 લોકો બર્થ-ડે પાર્ટીની મહેફીલ માણતા હતા ત્યાં પોલીસે રંગમાં ભંગ પાડયો : દારૂ, વાહનો સાથે 26 લાખનો મુદ્દામાલ જપ્ત
(વર્તમાન પ્રવાહ વાપી બ્યુરો)
વાપી, તા.27
વલસાડ નજીક આવેલ અતુલ વિસ્તારના એક બંગલામાં મંગળવારે રાત્રે બર્થ-ડે પાર્ટીની શરાબ-કબાબની મહેફીલ ચાલતી હતી, ત્યારે જિલ્લા એસ.પી.એ રાત્રે રેડ પાડીને મહેફીલની રંગતમાં લીન એક પી.એસ.આઈ., ત્રણ કોન્સ્ટેબલ સહિત 19 લોકોને પોલીસે ઝડપી પાડયા હતા. ઘટનાને લઈ પોલીસ બેડામાં ચકચાર મચી જવા પામી હતી.
છેલ્લા બે દિવસથી અમદાવાદ-ધોળકા વિસ્તારનો લઠ્ઠાકાંડે સમગ્ર ગુજરાતને હચમચાવી દીધુ છે. તે પછી જિલ્લા પોલીસને તાકીદ કરાઈ હતી કે દેશી દારૂ અને બુટલેગરો સામે કાર્યવાહી કરી ઓર્ડરના કલાકો બાદ જ અતુલના એક બંગલામાં ખુદ એસ.પી. ઝાલા ટીમ સાથે ત્રાટક્યા હતા.અતુલના મુકુંદ વિસ્તારમાં આવેલ ગેટ નં.1 પાસેના બંગલામાં સન્ની બાવીસ નામના ઈસમની બર્થ-ડે પાર્ટી મંગળવારે રાત્રે ચાલી રહી હતી. પાર્ટીમાં તેમના મિત્ર નાનાપોંઢા પો.સ્ટે.ના પી.એસ.આઈ. અને ત્રણ કોન્સ્ટેબલ સહિત 19 લોકો શરાબ કબાબની મહેફીલ માણતા હતા ત્યાં પોલીસે રંગમાં ભંગ પાડયો હતો. પોલીસે તમામની ધરપકડ કરી હતી. સ્થળ કાર્યવાહીમાં રૂા.9650 દારૂનો જથ્થો 5, કાર 7, બાઈક સહિત 12 વાહનો મળી કુલ 26 લાખનો મુદ્દામાલ જપ્ત કરાયો હતો. ઘટનાની જાણ બાદ પોલીસ બેડામાં જ સારી એવી ચકચાર મચી હતી. કારણ કે ખુદ આખી જ મહેફીલમાં ઝડપાઈ હતી.
