ચારની ધરપકડ : ચાર વોન્ટેડ જાહેર કરી પોલીસે 5.84 લાખનો મુદ્દામાલ જપ્ત કર્યો
(વર્તમાન પ્રવાહ વાપી બ્યુરો)
વાપી, તા.27
કપરાડા પોલીસ પેટ્રોલીંગમાં હતી ત્યારે કપરાડા જામગભાણ ત્રણ રસ્તા નજીક એક પીકઅપ જીપનું ચેકીંગ કરી નાસિક લઈ જવાઈ રહેલા બે વાછરડી અને બે ગાયોને ઉગારી લીધા હતા. કાર્યવાહીમાં ચાર ઈસમોની ધરપકડ કરી હતી તેમજ ચાર વોન્ટેડ જાહેર કરી પોલીસે મોબાઈલ પીકઅપ સહિત 5.84 લાખનો મુદ્દામાલ જપ્ત કર્યો હતો.
પ્રાપ્ત વિગતો જાણવા મળ્યા મુજબ ગતરોજ મંગળવારે કપરાડા પોલીસ નાસિક રોડ ઉપર પેટ્રોલીંગમાં હતી તે દરમિયાન કપરાડા જામગભાણ ત્રણ રસ્તા પાસે નાસિક તરફ જઈ રહેલ પીકઅપ જીપ નં.એમએચ 21 બીએચ 4983ને અટકાવી ચેકીંગ કર્યું હતું. જેમાં પીકઅપમાં ઠાંસીને ક્રુરતા પૂર્વક બે ગાય અને બે વાછરડી ભરેલી મળી આવી હતી. પોલીસે ચાલક પાસે પાસ પરમીટ માંગતા અધિકૃત પુરાવા પેપર રજૂ નહીંકરેલા તેથી ચાલક રવિ ગંગારામ પ્રધાન રહે.નાસિક, સુરેશ શેરાવત રહે.જાલના, બાઈક નં.જીજે 15 બીપી 9867 ઉપર પેટ્રોલીંગ કરી રહેલ શેર મહંમદ ઉર્ફે શેર મોહંમદ મકરાણી રહે.નાનાપોંઢા, રાજુ ઉર્ફે રવિ કુરેશી રહે.પંચવટી મળી કુલ ચાર આરોપીની અટક કરાઈ હતી તેમજ ગાયો ભરાવનાર અને મંગાવનાર ચારને વોન્ટેડ જાહેર કરી પોલીસે મોબાઈલ પીકઅપ સહિત 5.84 લાખનો મુદ્દામાલ જપ્ત કર્યો હતો.
