સપ્ટેમ્બરમાં યોજાનારી રાષ્ટ્રીય સુબ્રતો મુખરજી કપ ફૂટબોલ ટૂર્નામેન્ટમાં બોયઝ અન્ડર-17માં સેન્ટ ફ્રાન્સિસ સ્કૂલ દૂધની, બોયઝ અન્ડર-14માં જ્ઞાનમાતા હાઈસ્કૂલ ખાનવેલ અને ગર્લ્સ અન્ડર-17માં કોસ્ટગાર્ડ પબ્લિક સ્કૂલ દમણ, દાદરા નગર હવેલી અને દમણ-દીવનું પ્રતિનિધિત્વ કરશે
(વર્તમાન પ્રવાહ ન્યુઝ નેટવર્ક)
દમણ, તા.02: આજે મોટી દમણના ફૂટબોલગ્રાઉન્ડ ખાતે રમાયેલ પ્રિ-સુબ્રતો મુખરજી કપ ફૂટબોલ ટૂર્નામેન્ટમાં બોયઝ અન્ડર-17 અને 14માં દાદરા નગર હવેલી તથા ગર્લ્સ અન્ડર-17માં દમણની ટીમ ફાઈનલ વિજેતા બની હતી.
રાષ્ટ્રીય સ્તરની યોજાનારી સ્પર્ધામાં બોયઝ અન્ડર-17માં દૂધની-દાનહની સેન્ટ ફ્રાન્સિસ સ્કૂલ અને બોયઝ અન્ડર-14માં ખાનવેલ-દાનહની ટીમ તથા ગર્લ્સ અન્ડર-17માં કોસ્ટગાર્ડ પબ્લિક સ્કૂલ-દમણ પ્રદેશનું પ્રતિનિધિત્વ કરશે. આ રાષ્ટ્રીય ટૂર્નામેન્ટ સપ્ટેમ્બરમાં યોજાશે.
આજે યોજાયેલ ઈનામ વિતરણ સમારંભમાં યુવા કાર્યક્રમ અને ખેલ વિભાગના નિર્દેશક શ્રી અરૂણ ગુપ્તા, સહાયક શારીરિક શિક્ષણ અધિકારી શ્રી અક્ષય કોટલવાર અને કોસ્ટગાર્ડ પબ્લિક સ્કૂલ દમણના પ્રિન્સિપાલ શ્રીમતી ઐની મેરી ગૌનસાલ્વીઝે ટ્રોફી, મેડલ અને યોગામેટ આપી ખેલાડીઓને પ્રોત્સાહિત કર્યા હતા.
