એસીડ રોડ ઉપર રેલાતા ધુવાડાના ગોટેગોટા છવાઈ જતા લોકોનો શ્વાસ રુંધાયો
(વર્તમાન પ્રવાહ વાપી બ્યુરો)
વાપી, તા.05
વાપી હાઈવે ગુંજન ગીરીરાજ હોટલ સામે આજે શુક્રવારે 10 વાગ્યાના સુમારે અચાનક ટ્રકમાંથી એક એસીડ ભરેલ મહાકાય ડ્રમ નીચે પડી જતા અફરા તફરીનો માહોલ કલાકો સુધી છવાઈ ગયો હતો.
વાપી નેશનલ હાઈવે ગીરીરાજ હોટલ સામે અમદાવાદ તરફ જતી લાઈન ઉપર આજે સવારે ટ્રકમાંથી મહાકાય એસીડ ભરેલુ ડ્રમ નીચે પટકાયું હતું. પટકાતાની સાથે ડ્રમ લીકેજ થતા રોડ ઉપર એસીડનો વહાવ શરૂ થયો હતો.જેને લઈ ચોમેર ધુમાડાના ગોટેગોટા વાતાવરણમાં ફેલાયેલા હતા. આજુબાજુમાં એકત્ર થયેલા અને આવતા જતા વાહન ચાલકોના શ્વાસ રુંધાવા લાગેલા. ઘટનાની જાણ પોલીસ અને ફાયર બ્રિગેડને કરવામાં આવતા ઘટના સ્થળે ધસી આવેલ, ઢોળાયેલા એસીડ ઉપર ફોર્મ અને પાણીનો મારો ચલાવાયેલા. જેથી ધુવાડો કાબુમાં આવી ગયો હતો. ડ્રમને બાંધીને સલામત સ્થળે ખસેડાયું હતું. ક્યાંની ટ્રક હતી તેની પોલીસે આગળની તપાસ હાથ ધરી હતી.
