વર્તમાન પ્રવાહ ન્યુઝ નેટવર્ક)
વલસાડ, તા. 18: વલસાડ જિલ્લાના ધરમપુર તાલુકાના વિલ્સન હિલ ખાતે જિલ્લા વહીવટી તંત્ર વલસાડ અને ગુજરાત પ્રવાસન નિગમ લિમિટેડ દ્વારા આયોજિત મોનસૂન ફેસ્ટિવલ ૨૦૨૨ માં આદિવાસી પરંપરા, સાંસ્કૃતિક કાર્યક્રમો, પ્રદર્શન, મેળો અને જંગલ ટ્રેકિંગ સહિત વિવિધ કાર્યક્રમોનું આયોજન કરાયું હતું. જે અંતર્ગત તા.૧૫મી ઓગસ્ટે સ્વાતંત્ર્ય પર્વની ઉજવણીના ઉપલક્ષમાં વલસાડના જાદુગર ધીમંત મસરાણી (ડી.લાલ)એ ખાલી ફ્રેમમાંથી મહાત્મા ગાંધીજીના દર્શન, હવામાંથી તિરંગી પટ્ટીનો વરસાદ, ત્રિરંગી ફૂલો અને સૂતરની આંટી દ્વારા રાષ્ટ્રપ્રેમના અનેક મનમોહક કાર્યક્રમ રજૂ કરી લોકોના દિલ જીતી લીધા હતા. આ કાર્યક્રમમાં રેણુકાબેન, મનહરભાઇએ દેશભક્તિના ગીતો રજૂ કર્યા હતા. બિપીનભાઇ અને સાગર રાજ તબલા-હારમોનીયમથી મધુર સંગીત પીરસ્યું હતું. કાર્યક્રમનું સંચાલન રમેશભાઇ શાહે કર્યું હતું.