વાપીમાં બુધવારે આગના બે બનાવ : કરવડ ઈન્ડસ્ટ્રીયલ ઝોનમાં હાર્દિક પોલીમર પ્લાસ્ટીક કંપની આગની લપેટોમાં આવી
(વર્તમાન પ્રવાહ વાપી બ્યુરો)
વાપી, તા.24: વાપીમાં બુધવારે આગના બે બનાવ બનવા પામ્યા છે. મળસ્કે સેકન્ડ ફેઈઝ જી.આઈ.ડી.સી.માં આવેલ શ્રીજી વેફર નમકીન અને સ્વીટ બનાવતી કંપનીમાં આગ લાગી હતી. તો સવારે 8 વાગ્યાના સુમારે વાપી નજીક આવેલ કરવડ ઈન્ડસ્ટ્રીયલઝોનમાં એક પ્લાસ્ટીક કંપનીમાં આગ લાગી હતી.
વાપી નજીક કરવડ રોડ ઉપર આકારીત ઈન્ડસ્ટ્રીયલ ઝોનમાં આવેલ હાર્દિક પોલીમર નામની નવીન કાર્યરત થઈ રહેલી કંપનીમાં પ્રોડક્ષન શરૂ થાય તે પહેલાં આજે બુધવારે સવારે અચાનક શોર્ટ સર્કિટ થવાથી ભિષણ આગ લાગી હતી. આગની જાણ વાપી નોટીફાઈડ અને પાલિકા ફાયર બ્રિગેડને કરવામાં આવતા ચાર બંબા ઘટના સ્થળે દોડી આવ્યા હતા. બે-ત્રણ કલાકની જહેમત બાદ ફાયરબ્રિગેડએ આગ પર કાબુ મેળવી લીધો હતો. આગમાં કંપનીના નવા મશીનો પ્લાસ્ટીક રો-મટેરીયલ અને અન્ય સરસામાન મળી લાખોનું નુકશાન થયાનો અંદાજો છે. આગમાં અન્ય કોઈ જાન-હાની થયેલ નથી. વાપીમાં દિવસમાં બે આગની ઘટના ઘટતા ચર્ચાઓનો દોર લગાતાર રહ્યો હતો.