યુવાન તમંચો લઈને આવ્યો હતો દુકાનદાર અને આજુબાજુના લોકોએ યુવાનને ઝડપી પાડી પોલીસને સોંપી દીધો
(વર્તમાન પ્રવાહ ન્યુઝ નેટવર્ક)
સેલવાસ,તા.24: દાદરા નગર હવેલીના વાસોણા ચાર રસ્તા નજીક આવેલ મોબાઈલની દુકાનમાં બંધ કરવાના સમયે એક યુવાન અચાનક દુકાનમાં ઘુસી ચોરીનો પ્રયાસ કરી ભાગી રહ્યો હતો, જેને દુકાનના માલિક અને આજુબાજુના લોકોએ ઝડપી પાડી પોલીસને સોંપી દીધો હતો.
પ્રાપ્ત વિગત અનુસાર હરિઓમ ટેલિકોમ જેના માલિક શ્રી જયેશભાઈ જેઓ રાત્રે નવ વાગ્યાના સુમારે દુકાન બંધ કરી રહ્યા હતા તે સમયે અચાનક એક યુવાન દુકાનમાં ઘુસી ગયો હતો અને અંદરનો સામાન ચોરી કરવાનો પ્રયાસ કરી રહ્યો હતો જે શ્રી જયેશભાઈએ જોઈલેતા એ યુવાને એના ખિસ્સામાંથી ગન કાઢી ચલાવવાનો પ્રયાસ કર્યો હતો. પરંતુ ગન ચાલી ન હતી જેથી દુકાનના માલિકે અજાણ્યા યુવાનનો પીછો કર્યો હતો. જેને જોઈ આજુબાજુના લોકો પણ દોડી આવ્યા હતા અને ભાગવાનો પ્રયાસ કરનાર યુવાનને ઝડપી પાડયો હતો અને થોડો મેથીપાક ચખાડયા બાદ પોલીસને જાણ કરવામાં આવી હતી અને ચોર યુવાનને પોલીસે કબ્જો લઈ રખોલી આઉટપોસ્ટ પર લઈ જવામાં આવ્યો હતો. આ ઘટનાની વધુ તપાસ પીએસઆઈ શ્રી નિલેશ કાટેકર કરી રહ્યા છે.
