(વર્તમાન પ્રવાહ વાપી બ્યુરો)
વાપી, તા.01
વર્તમાન સમયમાં વાલીઓ બાળકોની જીદ સામે ઝુકી બાઈક, મોબાઈલ જેવી સુવિધાઓ આપી દેતા હોય છે પરંતુ બાઈક અને મોબાઈલ ક્યારેક જીવલેણ બની જતી હોય છે. કંઈક તેવી જ કરુણ ઘટના બુધવારે સવારે વાપી જુના ગરનાળા ઉપર રેલવે ટ્રેક ઉપર ઘટી હતી. ઘરેથી ટયુશન જવા નિકળેલો વિદ્યાર્થી હેડફોન કાને લગાવી ટ્રેક ક્રોસ કરી રહ્યો હતો ત્યારે ટ્રેન અડફેટે આવી જતા ઘટના સ્થળે જ મોતને ભેટયો હતો.
વિગત મુજબ વાપી ટાઉન દેસાઈવાડમાં નટુભાઈની ચાલીમાં રહેતો અને ગીતાનગર સરદાર પટેલ સ્કૂલ ધો.12માં અભ્યાસ કરતો વિદ્યાર્થી વિવેક વિનયકુમાર સીંગ (ઉ.વ.17) ઘરેથી રાબેતા મુજબ સવારે 9 વાગે ટયુશને જવા નિકળ્યો હતો. જુના રેલ ગરનાળા ઉપર ચઢીને રેલવે લાઈન ક્રોસ કરી રહ્યો હતો ત્યારે એન્જીન આવી ગયું હતું. લોકોએ બુમો લગાવી, ટ્રેન ચાલકોએ અનેક હોર્ન માર્યા પરંતુ હેડફોન હોવાથી વિવેકે સાંભળ્યું નહીં અને ટ્રેનઅડફેટમાં આવી જતા મોતને ભેટયો હતો. વિવેક માટે હેડફોન કેટલો ખતરનાક સાબિત થયો, કરુણાંતિકા સર્જાઈ તેથી વાલીઓ માટે આ સબબ લેવા જેવી સુચક ઘટના વાપીમાં ઘટી હતી.
