પિતા-પુત્ર કપરાડાના ઓઝરડાથી ખેતીનો સામાન લેવા વાપી આવ્યા હતા
(વર્તમાન પ્રવાહ વાપી બ્યુરો)
વાપી, તા.01: વાપી નજીક છીરી વલ્લભનગર પાસે પુર ઝડપે જતી ડમ્પર ટ્રકે બાઈકને ટક્કર મારી દેતા અકસ્માત સર્જાયો હતો. જેમાં બાઈક સવાર પિતા-પુત્ર નીચે પટકાઈ જતા પિતાનું ઘટના સ્થળે જ કરુણ મોત નિપજતા ચકચાર મચી જવા પામી હતી.
કપરાડાના ઓઝરડા ગામે રહેતા દિનેશ મહંતુ બાઈક નંબર જીજે 15 ઈએછ 7324 ઉપર સવાર થઈ બુધવારે સવારે વાપી આવ્યા હતા.ખેતીનો જરૂરી સામાન ખરીદી પિતા-પુત્ર પરત ઓઝરડા જવા નિકળ્યા હતા ત્યારે છીરી વલ્લભનગર પાસે પુરઝડપે આવી રહેલ ડમ્પર ટ્રક નં.જીજે 15 વાયવાય 9907 ના ચાલકે બાઈકને ટક્કર મારી અકસ્માત સર્જ્યો હતો. પિતા-પુત્ર બાઈક ઉપરથી પટકાયા હતા. જેમાં પિતાને ગંભીર ઈજાઓ પહોંચતા સ્થળ ઉપર જ મૃત્યુ પામ્યા હતા. અકસ્માત બાદ ડમ્પર ચાલક નજીકના છીરી પોલીસ ચોકીમાં હાજર થઈ ગયો હતો. પોલીસે અકસ્માત ગુનો નોંધી મૃતદેહને પી.એમ. માટે ખસેડયો હતો. ડમ્પર વાપીની જયભારત રોડ કન્સ્ટ્રકશન કંપનીનું હોવાનું જાણવા મળ્યું છે.
