શિક્ષકોની 15 જેટલી પડતર માંગણી છે : પ્રાથમિક શિક્ષકો લાંબા સમયથી આંદોલન ચલાવી રહ્યા છે
(વર્તમાન પ્રવાહ વાપી બ્યુરો)
વાપી,તા.04: ગુજરાત રાજ્ય પ્રાથમિક શિક્ષક સંઘના નેજા હેઠળ વલસાડ જિલ્લા પ્રાથમિક શિક્ષકો પડતર માંગણીઓ માટે આંદોલન ચલાવી રહ્યા છે. આજે વલસાડમાં શિક્ષકો રસ્તા ઉપર ઉતરી રેલી કાઢીને કલેક્ટરને આવેદનપત્ર પાઠવ્યું હતું.
રાજ્ય પ્રાથમિક શિક્ષક સંઘ દ્વારા ઘણા લાંબા સમયથી સરકાર સમક્ષ ગ્રેડ પે જુની પેન્શન સ્કીમ સહિતની વિવિધ પડતર 15 માંગણીઓ માટે આંદોલન ચલાવી રહ્યું છે. રાજ્ય સરકારને અનેકોવાર રજૂઆતો કરવામાં આવી છતાં કોઈ સત્તાવાર નિર્ણય જાહેર કરાયો નથી તેથી શિક્ષકો દ્વારા આંદોલનનો મુડ જોવા મળી રહ્યો છે. આજે વલસાડમાં શિક્ષકો રસ્તા ઉપર ઉતરી રેલી કાઢી કલેક્ટરને આવેદનપત્ર સુપરત કર્યું હતું. હમણાં હમણાં ચૂંટણી નજીક આવી રહી હોવાથી સરકારી કર્મચારીઓ આંદોલન કરી રહ્યા છે. આરોગ્ય, વીજ કંપની, શિક્ષણ વિભાગ જેવા અનેક વિભાગના કર્મચારીઓ આંદોલન ચલાવી રહ્યા છે.
