(વર્તમાન પ્રવાહ વાપી બ્યુરો)
વાપી, તા.05: વલસાડ તિથલ દરિયામાં વલસાડ પોલીસ વિભાગમાં ફરજ બજાવતી મહિલા કોન્સ્ટેબલએ રવિવારે સાંજના દરિયામાં કુદીને જીવનનો રહસ્યમય અંત આણી દીધો હતો. મહિલા કોન્સ્ટેબલના આપઘાતને પગલે પોલીસ બેડામાં ચકચાર મચી જવા પામી હતી.
પ્રાપ્ત વિગતો અનુસાર વલસાડ સીટી પોલીસ વિભાગમાં પૂજાબેન નામની મહિલા કોન્સ્ટેબલ તરીકે ફરજ બજાવી રહેલ હતી. થોડા સમય પહેલાં જ તેમણે પોલીસ કોન્સ્ટેબલ તરીકેની નોકરી જોઈન્ટ કરી હતી. પરંતુ ગઈકાલે કોઈ અગમ્ય કારણોસર રહસ્યમય રીતે પૂજાબેનએ તિથલના દરિયામાં મોતની છલાંગ લગાવી આપઘાત કરીલીધો હતો. પોલીસને જાણ થતા પોલીસએ મહામહેનત અને શોધખોળને અંતે તેમનો મૃતદેહ શોધી કાઢી પી.એમ. માટે મોકલી આપેલ તેમજ ગુનો નોંધી પોલીસે આગળની તપાસ હાથ ધરી છે.
