ડુંગરા પોલીસે સ્થળ ઉપર અને અંગ જડતીમાં રૂા.6380 નો મુદ્દામાલ જપ્ત કર્યો
(વર્તમાન પ્રવાહ વાપી બ્યુરો)
વાપી, તા.05: અત્યારે વાપી વિસ્તારમાં સમગ્ર જગ્યાએ ઠેર ઠેર ગણેશ મહોત્સવની ધુમ ચાલી રહી છે. તેની સાથે સાથે ગણેશ પંડાલોમાં જુગાર રમતા લોકો પણ ઝડપાઈ રહ્યા છે. આજે સોમવારે વાપી નજીક સલવાવ ગામે મંદિર પાસે પ્રસ્થાપિત કરેલા ગણેશ પંડાલનીપાછળ જુગાર રમતા પાંચ યુવાનો ડુંગરા પોલીસના હાથે ઝડપાઈ ગયા હતા.
આસ્થા અને ધર્મ સાથે સંકળાયેલ ગણેશ મહોત્સવને આજના યુવાનો લાંછન લગાવી રહ્યા છે. શનિવારે વાપી નજીક કોચરવા ગામે ગણેશ પંડાલમાં જુગાર રમતા 10 ઉપરાંત યુવાનો ઝડપાયા હતા. તેવો જ બીજો બનાવ આજે સલવાવ ગામે બન્યો હતો. મંદિર પાસે આવેલ ગણેશ પંડાલની પાછળ જુગાર રમાઈ રહ્યો હતો તે દરમિયાન ડુંગરા પોલીસે રેડ કરી હતી. કાર્યવાહીમાં ભાવેશ કોળી પટેલ, અશોક ભંડારી, માલવભાઈ, અંકિત અને હેતલ નામના પાંચ યુવાનો જુગાર રમતા ઝડપાયા હતા. પોલીસે અંગ ઝડતી અને દાવના મળી કુલ રોકડા રૂા.6380 મુદ્દામાલ તરીકે જપ્ત કરી કાયદેસરની કાર્યવાહી કરી હતી.