એલ.સી.બી.એ દારૂનો જથ્થો, માલ-સામાન, વાન સાથે રૂા.4 લાખનો મુદ્દામાલ જપ્ત કરી ચાલક સિરાઝ ઉલ્લાની અટક કરી
(વર્તમાન પ્રવાહ વાપી બ્યુરો)
વાપી, તા.06: દારૂની ખેપ મારવા બુટલેગરો રોજેરોજ અવનવી તરકીબ અજમાવતા રહ્યા છે. આજે ટુકવાડા હાઈવેથી એલ.સી.બી.એ મચ્છરદાની, ધાબળા, ચાદર ભરેલ ગુડ્ઝ વાન ઝડપી પાડી વાનમાં છુપાવેલો રૂા.90 હજારનો દારૂનો જથ્થો સાથે ચાલકને ઝડપી પાડયો હતો.
પ્રાપ્ત વિગતો મુજબ એલ.સી.બી. સ્ટાફ કોન્સ્ટેબલ હિતેશ ચાવડા અને હેડકોન્સ્ટેબલ મહેન્દ્રભાઈને બાતમી મળી હતી કે દમણથી દારૂનો જથ્થો ભરેલી ગુડ્ઝ વાન નિકળી છે તે અનુસાર એલ.સી.બી.એ હાઈવે ઉપર વોચ ગોઠવી હતી. બાતમી વાળી ગુડ્ઝ કાર નં.જીજે 15 એવી 2982 આવતા અટકાવી ચેકીંગ કર્યું હતું તો વાનમાં ધાબળા, ચાદર, મચ્છરદાનીનો સામાન ભરેલો હતો. બાતમી પાકી હોવાથી ઘનિષ્ઠ ચેકીંગ બાદ સામાન નીચે દારૂના બોક્ષ મળી આવ્યા હતા. પોલીસે 816 બોટલ કિ. રૂા.90 હજાર, વાન અને સામાન મળી કુલ રૂા.4 લાખના મુદ્દામાલ સાથે વાહન ચાલક સિરાઝ ઉલ્લા રહે.વડોદરાની અટક કરી હતી. તપાસમાં નંબરપ્લેટ પણ ડુપ્લીકેટ હોવાનું બહાર આવ્યું હતું.
