ધરમપુર સજની બરડા ગામે ખેતરમાં 50 વર્ષિય ખેડૂતનું વિજળી પડતા મોત
(વર્તમાન પ્રવાહ વાપી બ્યુરો)
વાપી, તા.08: હવામાન ખાતાની આગાહી તેમજ બંગાળ ખાડીમાં અપર સરક્યુલેટ ક્રિએટ થતા આજે વાપી સહિત વલસાડજિલ્લામાં ગાજવીજના ગગડાટ સાથે બપોરે સતત બે કલાક વરસાદ પડયો હતો. તોફાની વરસાદની સાથે સાથે અંધારપટ પણ છવાઈ ગયો હતો. સમગ્ર જગ્યાએ દોડતું જનજીવન થંભી ગયું હતું. તોફાની વરસાદ અને ભારે વિજળીના ખાટકાથી આકાશ ગાજતું રહ્યું હતું. તેની કારમી અસર ધરમપુરના સજની બરડા ગામે ખેતરમાં ગયેલ 50 વર્ષિય ખેડૂત ઉપર વિજળી પડતા ઘટના સ્થળે જ મોત થવા પામ્યું હતું.
ગુરૂવારે બપોર પછી વાપી સહિત સમગ્ર જિલ્લામાં મેઘરાજાએ અતિ તોફાની બેટીંગ કરી હતી. રોડ, રસ્તા, નાળા તથા નિચાણવાળા વિસ્તારોમાં વાપીમાં પાણી ભરાઈ ગયા હતા. રેલનાળામાં પાણી ભરાઈ જતા અવરજવર બંધ થઈ ચૂકી હતી. તો ધરમપુરના સજની બરડા ગામે ખેતરમાં નિંદામણ કરવા ગયેલ 50 વર્ષિય ખેડૂત સુરકાવ ફળીયામાં રહેતા રાજીરામ બચુભાઈ સુરઠા પત્ની નંદુબેન સાથે ખેતરમાં હતા ત્યારે ભારે વરસાદમાં ઝાડની ઓથ લીધી હતી ત્યારે અચાનક આકાશી વિજળી ઝાડ ઉપર પડતા રાજીરામનું ઘટના સ્થળે મોત થયું હતું. ગ્રામજનો પીકઅપમાં તેમને ખેતરમાંથી સ્ટેટ હોસ્પિટલમાં લવાયા હતા. જ્યાં તેમને મૃત જાહેર કરાયા હતા. વરસાદે સર્જેલી ખાનાખરાબીની અસર સજની બરડા ગામે વર્તાઈ હતી. સમગ્ર જિલ્લામાં બે કલાકમાં બે થી ત્રણ ઈંચ વરસાદ પડયો હતો.