સુપ્રિત કેમિકલ ઈન્ડસ્ટ્રીઝમાં વહેલી સવારે આગ લાગી : દશ ઉપરાંત ફાયર ફાઈટર ઘટના સ્થળે ધસી ગયા
(વર્તમાન પ્રવાહ વાપીબ્યુરો)
વાપી, તા.16
વાપી જી.આઈ.ડી.સી. થર્ડ ફેઈઝ વિસ્તારમાં આવેલી એક કેમિકલ કંપનીમાં આજે શુક્રવારે સવારે અચાનક ભીષણ આગ લાગી હતી. આગની જાણ બાદ ચારે તરફ દોડધામ મચી જવા પામી હતી.
વાપી જી.આઈ.ડી.સી. થર્ડ ફેઈઝ વિસ્તારમાં આવેલી સુપ્રિત કેમિકલ ઈન્ડસ્ટ્રીઝમાં આજે શુક્રવારે સવારે અચાનક કંપનીમાં ભિષણ આગ લાગી હતી. આગનું સ્વરૂપ એટલું વિકરાળ હતું કે જોત જોતામાં આખી કંપની આગની લપેટામાં આવી ગઈ હતી. ચોમેર ધુમાડાના ગોટેગોટા છવાઈ ગયા હતા. સુપ્રિત કેમિકલની આગને લઈ આજુબાજુની કંપનીઓમાં પણ ભય ફેઈ ગયો હતો. દરેક કંપનીના કામદારો સલામત અંતરે દોડી ગયા હતા. સુપ્રિતના કામદારો પણ સમય સુચકતા વાપરી કંપનીની બહાર નિકળી આવ્યા હતા. આગમાં કોઈ જાનહાનીનો અહેવાલ નથી. આગની જાણ થતા તુરંત વાપી નગરપાલિકા, સરીગામ, અતુલથી 10 જેટલા ફાયર ફાયટરો ઘટના સ્થળે દોડી આવી આગને બુઝાવવાની ભારે જહેમત ઉઠાવી હતી. આગ લાગવાનું કારણ જાણી શકાયું નથી.
