(વર્તમાન પ્રવાહ ન્યુઝ નેટવર્ક)
ચીખલી,(વંકાલ), તા.13: ચીખલીના દેગામ સ્થિત સોલાર કંપનીમાંથી ચોરેલ સોલાર પ્લેટો રૂા.1.38 કરોડ સાથે પીએસઆઈ શ્રી સમીર જે. કડીવાલા સહિતના સ્ટાફે રાત્રિ દરમિયાન ચાસા ગામેથી ત્રણ જેટલા અને ઝડપી પાડયા હતા.જેમાં તપાસ દરમિયાન અન્ય લોકોની પણ સંડોવણી બહાર આવતા રાજકોટના એક સહિત વધુ પાંચ લોકોને ઝડપી પાડી નામદાર કોર્ટમાંથી રિમાન્ડ મેળવી આગળની તપાસ હાથ ધરતા પોલીસે દિલીપ છગન જાદવાણી (રહે.બી-501 રોયલ રિપોઝ નિકોલ ભક્તિ સર્કલ, અમદાવાદ)ની પણ ધરપકડ કરી કોર્ટમાં રજૂ કરી રિમાન્ડ મેળવવાની તજવીજ હાથ ધરી હતી.
સોલાર કંપનીમાંથી સોલાર પ્લેટોની ચોરીના ગુનાના ટૂંકા ગાળામાં જ પોલીસે આઠેક જેટલા આરોપીઓની ધરપકડ કરી છે. દેગામ સ્થિત ઉપરોક્ત સોલાર કંપનીમાં સિકયુરિટી અને અન્ય સ્ટાફને ચોરીની આશંકા જતા તેઓ ઝીણવટ ભરી તપાસ કરી નજર રાખી હતી. આ દરમિયાન રાત્રિના સમયે પોલીસે પ્લેટોના જથ્થા સાથે આરોપીઓને દબોચી લઈ તે જ ગતિએ તપાસ હાથ ધરી આઠ એક જેટલા આરોપીઓને પણ ઝડપી લઈ ચોરીના સમગ્ર ગુનાનો પર્દાફાશ કરી પ્રશંસાપાત્ર કામગીરી કરતા કંપનીના અધિકારીઓ પણ પોલીસની કામગીરીને બિરદાવી રહ્યા છે.