છેલ્લા એક મહિનાથી અજાણ્યા બેભાન યુવકની સારવાર તથા સેવા-ચાકરી કરી રહી છે હોસ્પિટલઃ હોસ્પિટલની નર્સો પોતાના ટિફિનમાંથી યુવકને જમાડી રહી છે
(વર્તમાન પ્રવાહ ન્યુઝ નેટવર્ક)
પારડી, તા.13: પારડી ખાતે આવેલ પારડી કુરેશી હોસ્પિટલના નામે પ્રખ્યાત હોસ્પિટલમાં છેલ્લા એક મહિના અગાઉ 108 દ્વારા અકસ્માત થયેલ બેભાન યુવકને લાવવામાં આવ્યો હતો. આ યુવકની હાલત ખૂબ ગંભીર હોય ફરજ પરના ડોક્ટરો, ડોક્ટર કુરેશી તથા તેમના સ્ટાફે ખૂબ મહેનત કરીને યુવકને ફરી પાછો મૂળ સામાન્ય સ્થિતિમાં લાવવામાં આવ્યો હતો. આ સમયગાળા દરમ્યાન આ યુવક સાથે એમના ભાઈ હોવાનું કહી અન્ય એક વ્યક્તિ પણ રહેતો હતો પરંતુ સમય વિતતા આ અજાણ્યો યુવક સંપૂર્ણ રીતે સારો થઈ જતા સાથે રહેતો યુવક અચાનક ગાયબ થઈ ગયો હતો. ત્યારબાદ પણ માનવતાના ધોરણે ડોક્ટરો તથા સ્ટાફે આ યુવકની સેવાચાક્રી ચાલુ રાખી હતી અને હાલની તારીખમાં પણ આ યુવક હોસ્પિટલમાં જ રહે છે અને હોસ્પિટલની નર્સ પોતાના ટિફિનમાંથી તેમને જમવાનું આપી રહી છે. આમ આજના જમાનામાં પૈસા વિના કોઈપણ કામ થતું નથી ની યુક્તિને ખોટી ઠરાવી માનવ ધર્મ એ જ સાચો ધર્મ હોવાનું પારડી હોસ્પિટલ અને એમના તમામ સ્ટાફે પુરવાર કર્યું છે. આ અજાણ્યા યુવકની કોઈ ઓળખતું હોય કે જાણ હોય તો પારડી હોસ્પિટલને જાણ કરવા વિનંતી છે.