મધ્ય રાત્રિના 12:15 વાગ્યે 3 જેટલા દારૂના ખેપિયાઓ બોટને દરિયામાં છોડીને પાણીમાં તરીને કોલક તરફ ભાગી જવા સફળ
(વર્તમાન પ્રવાહ ન્યુઝ નેટવર્ક)
દમણ, તા.14 : દમણના આબકારી મદદનીશ કમિશનર શ્રી મોહિત મિશ્રાની અખબારી યાદીમાં જણાવાયા મુજબ દમણ પ્રશાસન તથા આબકારી વિભાગ દ્વારા ગેરકાયદે આવન-જાવન કરનારાઓ વિરૂદ્ધ સખ્ત અભિયાન ચલાવાઈ રહ્યું છે. તે અંતર્ગત ગત રવિવારે તા.13મી નવેમ્બરના રોજ રાત્રિના 11:00 વાગ્યે આબકારીવિભાગને ગુપ્ત માહિતી મળી કે, કડૈયા સમુદ્ર કિનારાથી એક બોટ દ્વારા ગેરકાયદેસર રીતે ગુજરાતમાં દારૂ ઘુસાડાઈ રહ્યો છે. જે મુજબ સહાયક આબકારી આયુક્ત તથા આબકારી નિરીક્ષણ શ્રી મિલનકુમાર પટેલ, શ્રી દીક્ષિત ચારણિયા, અને આબકારી રક્ષક(ગાર્ડ) શ્રી સુનિલ ધોડિયા, શ્રી મનિષ યાદવ, શ્રી અમિત રાજભર અને શ્રી યગ્નેશ પટેલ કડૈયા સમુદ્ર કિનારે રાત્રિના 11:30 વાગ્યે પહોંચતાં અહીં ઉપલબ્ધ પાંચ બોટોની તપાસ શરૂ કરી હતી, પરંતુ તે તમામ ખાલી હતી. ત્યારબાદ આબકારી વિભાગની ટીમે મધ્યરાત્રિના 12:15 વાગ્યે એક બોટને પાણી વચ્ચે ઉભેલી જોઈ હતી. પાણી ખુબ ઓછું હોવાના કારણે ત્યાં બીજી બોટ લઈને જવું અશક્ય હતું. ત્યારપછી આબકારી રક્ષક(ગાર્ડ) શ્રી સુનિલ ધોડિયાએ તરીને જવાનું શરૂ કર્યું. શ્રી સુનિલ ધોડિયા બોટની નજીક પહોંચતા જ બોટમાંથી ત્રણ લોકોએ પાણીમાં છલાંગ મારી અને તેઓ કોલક, ગુજરાત તરફ ભાગી ગયા હતા. આબકારી વિભાગે મળી આવેલ બોટની તપાસ કરતા તેમાંથી 8040 બોટલ દારૂ મળી આવ્યો હતો. તેથી આબકારી વિભાગે બોટ અને દારૂને જપ્ત કર્યો હતો અને આબકારી વિભાગે દાદરા નગર હવેલી અને દમણ-દીવ આબકારી જકાત કાયદો 1964 અને વસૂલી નિયમ 2020 અંતર્ગત કેસ નોંધી આગળની કાર્યવાહી હાથ ધરી હતી.
