તા.પં. સભ્ય સુનિલ ટંડેલના કોસંબા નિવાસ સ્થાને સિટી પોલીસે ખાનગી રાહે રેડ કરી : 11 હજાર દારૂનો જથ્થો મળ્યો
(વર્તમાન પ્રવાહ વાપી બ્યુરો)
વાપી, તા.15: વલસાડ જિલ્લામાં ચૂંટણી આચાર સંહિતાના અમલ સાથે જ પોલીસ અને સી.આર.પી.એફ.ના જવાનોએ પ્રોહિબિશન અંગે ભારે ચેકિંગની કામગીરી આરંભી દીધી છે. વલસાડ સિટી પોલીસને ખાનગી રાહે મળેલી બાતમી આધારે વલસાડ કોસંબામાં સોમવારે રાતે રેડ કરી હતી. જેમાં તા.પં.ના સભ્યના નિવાસ સ્થાનેથી દારૂનો જથ્થો મળી આવ્યો હતો. ઘટનાને લઈ વલસાડ રાજકીય વર્તુળોમાં ચકચાર મચી જવા પામી હતી.
પ્રાપ્ત વિગતો અનુસાર વલસાડ સિટી પોલીસને મળેલી બાતમી આધારે સોમવારેરાતે કોસંબા ગામે નિલકંઠ સ્વીટ ખાતે રહેતા તા.પં. ભાજપના સભ્ય સુનિલભાઈ ગોપાળભાઈ ટંડેલના ત્યાં ખાનગી રાહે રેડ પાડી હતી. પોલીસ કાર્યવાહીમાં 20 નંગ વિદેશી દારૂની બોટલ કિં. રૂા.11 હજારનો જથ્થો પોલીસને મળી આવ્યો હતો. સુનિલભાઈ ટંડેલ વિરૂધ્ધ પ્રોહિબિશનનો ગુનો નોંધી પોલીસે અટક કરી હતી. ઘટનાની જાણ બાદ વલસાડ ભાજપ કાર્યકરો સિટી પોલીસમાં દોડી ગયા હતા.