વિજય શાહ ભાજપમાં જોડાયા તથા ઈશ્વર પટેલે બિરસા મુંડા સમિતિ ઉપપ્રમુખે પણ ‘આપ’માંથી રાજીનામું આપી દીધું
(વર્તમાન પ્રવાહ વાપી બ્યુરો)
વાપી, તા.19: વલસાડ જિલ્લામાં વિધાનસભા ચૂંટણીનો પ્રચાર રાજકીય પક્ષો દ્વારા દબદબા પૂર્વક ચાલું થઈ ગયો છે. તે મધ્યે આમ આદમી પાર્ટીમાં ગાબડા પડવાનો પ્રારંભ થઈ ગયો છે. આપ માંડ માંડ જિલ્લામાં પીચ બનાવે તે પહેલાં જમીન સરકી ગઈ હોવાની નોંધપાત્ર રાજકીય ઘટનાઓ ગતરોજ ઘટી હતી. માજી ધારાસભ્ય અને બિરસા મુંડા સમિતિના ઉપપ્રમુખ ઈશ્વરભાઈ પટેલે આપ સાથે છેડો ફાડી લઈને રાજીનામું ધરી દીધું છે, તો પારડી આપના પ્રમુખ વિજય શાહ આપમાંથી રાજીનામું આપી ભાજપમાં જોડાઈ ગયા છે, આમ આદમી પાર્ટીને મોટો ફટકો પડયો છે.
આમ આદમી પાર્ટી જિલ્લામાં પ્રથમવાર વિધાનસભાની ચૂંટણી લડી રહી છે.ત્યારે જેમ તેમ કરી ઉમેદવારોની શોધખોળ પુરી કરી હતી. ટિકિટ ફાળવણીમાં વિવાદો સર્જાયા હતા. તેવો મોટો વ્વિાદ પારડી બેઠક માટે સર્જાયો છે. આ બેઠક માટે વાપી-પારડીથી ત્રણ દાવેદારી થઈ હતી. વાપીના ડો. રાજીવ પાંડે, પારડીના વિજય શાહ અને સંજયભાઈનો સમાવેશ થાય છે. ત્રણને પ્રમુખે વિશ્વાસમાંલીધા હતા. અંતે ટિકિટ બલીઠાના યુવાનને આપી દેતા આ બેઠક માટે આપમાં મોટી તિરાડ પડી અને ટપોટપ રાજીનામા પડયા હતા તે પૈકી આપ પારડી શહેર પ્રમુખ વિજયભાઈ શાહ તો શુક્રવારે સાંજે ભાજપના વાપી કાર્યાલય ઉદ્ઘાટનમાં ભાજપમાં જોડાઈને કેસરી ખેસ પહેરી લીધો હતો.
