(વર્તમાન પ્રવાહ ન્યુઝ નેટવર્ક)
ચીખલી,(વંકાલ), તા.02: ચીખલીના થાલાના રહેવાસી અને વલસાડ જિલ્લામાં શિક્ષક તરીકે ફરજ બજાવતા સતિષ મોહનભાઈ પટેલને વિધાનસભાની ચૂંટણીમાં વલસાડ જિલ્લાના કપરાડાના આસલુણા પ્રાથમિક શાળા સ્થિત બૂથ ઉપર પ્રિસાઈડીંગ ઓફિસર તરીકે અને પત્ની મિતલબેનને વલસાડમાં ચૂંટણીની ફરજ હોય તેમના બાળકોને મજીગામ મામાના ઘરે મુકીને ઘર બંધ કરી સવારે નિકળી ગયા હતા.આ દરમિયાન રાત્રીના સમયે તેમના ઘરનો મુખ્ય દરવાજો તોડી તસ્કરો ઘરમાં પ્રવેશી બેડરૂમમાં પ્લાયના કબાટનું લોક તોડી તેમાં મુકેલ સોનાનું મંગળ સૂત્ર કિં. રૂા. 80,000/-, સોનાનું પેન્ડલ કિં. રૂા.2પ,000/-, સોનાની બુટ્ટી અને સેટ કિં. રૂા.1,10,000/-, બેંગલ કિં. રૂા.1,25,000/- મળી કુલ્લે રૂા.3,40,000/-ની મત્તાની ચોરી કરી ફરાર થઈ ગયા હતા. ચૂંટણમાં ફરજ બજાવી રાત્રે ત્રણેક વાગ્યા બાદ સતિષભાઈએ ઘરે પહોંચ્યા ત્યારે ઘરનો દરવાજો તૂટેલ હોય અંદર તપાસ કરતા ચોરી થઈ હોવાનું જણાતા પોલીસને જાણ કરી હતી. આ અંગેની વધુ તપાસ પોલીસે હાથ ધરી હતી.
