(વર્તમાન પ્રવાહ ન્યુઝ નેટવર્ક)
દમણ, તા.14 : દમણના એક્સાઈઝ વિભાગે આજે નાની દમણ જેટી ઉપરના એક ગોડાઉનમાં ગેરકાયદે સંગ્રહેલ દારૂને જપ્ત કર્યો હતો.
પ્રાપ્ત માહિતી મુજબ દમણમાં ગેરકાયદે દારૂનો સંગ્રહ, સપ્લાય કરનારાઓ વિરૂદ્ધ એક્સાઈઝ વિભાગ સખત અભિયાન ચલાવી રહી છે તે મુજબ તા.14મીના બુધવારે સાંજે 4:00 વાગ્યાની આસપાસ એક્સાઈઝ નિરીક્ષક શ્રી અવિનાશ કુમ્ભાકર, શ્રી અંકિત ગુપ્તા અને એક્સાઈઝ ગાર્ડ શ્રી વિજય પાલ, શ્રી રાહુલ સોલંકી અને શ્રી સ્વરાજ સિંહને પેટ્રોલિંગ દરમિયાન એક શંકાસ્પદ ગાડી નંબર ડીડી-03 કે 6836 જોવા મળી હતી. જેનો પીછો કરતા નાની દમણ જેટી પાસે ગાડી એક ગોડાઉનમાં ગઈ હતી. એક્સાઈઝ વિભાગે તાત્કાલિક તે ગોડાઉન ઉપર છાપો મારતા ખબર પડી કે ગોડાઉનમાં મોટી માત્રામાં દારૂ જમા કરવામાં આવ્યો છે. આ અચાનક તપાસમાં એક્સાઈઝ વિભાગને કુલ 2544 દારૂની બોટલ જપ્ત કરવામાં સફળતા મળી હતી.
એક્સાઈઝ વિભાગે દાદરા નગર હવેલી અને દમણ-દીવ આબકારી જકાત અધિનિયમ 1964 અને જકાત નિયમ 2020 મુજબ કેસ નોંધી આગળની કાર્યવાહી હાથ ધરી છે.