3 ડિ.વાય.એસ.પી., 7 પી.આઈ., 22 પી.એસ.આઈ., 222 પોલીસ, હોમગાર્ડ અને લશ્કરી જવાનોનો ચુસ્ત બંદોબસ્ત
(વર્તમાન પ્રવાહ વાપી બ્યુરો)
વાપી, તા.07: વલસાડ સરકારી એન્જિનિયરિંગ કોલેજમાં આવતીકાલ તા.08 ડિસેમ્બર ગુરૂવારના રોજ મતગણતરી હાથ ધરવામાં આવશે તે માટે વહિવટી તંત્ર દ્વારા આયોજન કરી દેવામાં આવ્યું છે.
વિધાનસભાની વલસાડ, પારડી, ઉમરગામ, ધરમપુર અને કપરાડા મળી કુલ પાંચ બેઠકોની મતગણતરી હાથ ધરાશે. જેમાં બેઠક વાઈઝ 14-14 ટેબલ ગોઠવાયા છે. પ્રારંભ સવારે 8:00 કલાકે થશે. શરૂઆતમાં પોસ્ટલ બેલેટની ગણતરી હાથ ધરવામાં આવશે. ગણતરીમાં વલસાડ બેઠક 20 રાઉન્ડ, કપરાડા 22 રાઉન્ડ, ધરમપુર 21 રાઉન્ડ, પારડી 18 રાઉન્ડ અને ઉમરગામમાં 20 રાઉન્ડમાં ગણતરી પૂર્ણ કરાશે. ચૂંટણી ગણતરી દરમિયાન 3 ડિ.વાય.એસ.પી., 7 પી.આઈ., 22 પી.એસ.આઈ., 222 પોલીસ, હોમગાર્ડ તથા લશ્કરી દળના જવાનો તહેનાત રહેશે. મતગણતરીને વિશેષ માહિતી આપવામાટે વ્યવસ્થા કરવામાં આવી છે. મતગણતરી સંવેદનશીલ બાબત હોવાથી વહીવટી તંત્રએ ક્યાંય કચાશ બાકી રાખી નથી. હાર, જીતના પરિણામ બાદ કાર્યકરો દ્વારા કોઈ ગેરરીતી ના થાય તેની ઉપર પોલીસની બાજ નજર રહેશે.
