(વર્તમાન પ્રવાહ ન્યુઝ નેટવર્ક)
સેલવાસ,તા.12: હવામાન વિભાગની આગાહી મુજબ કેન્દ્ર શાસિત પ્રદેશ દાદરા નગર હવેલી અને દમણમાં આજે વહેલી સવારથી જ વાતાવરણમાં પલટો આવ્યો હતો. વાદળછાયા વાતાવરણ વચ્ચે દાહના કેટલાક વિસ્તારોમાં અમીછાંટણા પણ થયા હતા. આમ એક તરફ શિયાળાની ઠંડી અને બીજી તરફ કમોસમી વરસાદના કારણે ભરશિયાળે વાતાવરણમાં ગરમાટાની સાથે સોમાસું જામવાનું હોય એવું પ્રતિત થયું હતું. આ કમોસમી વરસાદને કારણે ખેડૂતોમા ચિંતાનો માહોલ જોવા મળ્યો છે. કારણ કે, હાલમાં આંબાના વૃક્ષો ઉપર મૌર ખીલી ઉઠયા છે, જે આ કમોસમી વરસાદને કારણે કેરીના પાકને નુકસાન થવાની ભીતિ વર્તાઈ રહી છે. સાથે શાકભાજી તથા અન્ય શિયાળુ પાકોને પણ નુકસાન થઈ શકે એમ છે. તેથી ધરતીપૂત્રોમા ચિંતાનો માહોલ જોવા મળ્યો છે. હવામાન વિભાગ દ્વારા હજી બે દિવસ વરસાદ પડવાની આગાહી કરી હોવાને કારણે વાતાવરણમાં વ્યાપેલી મિશ્ર ઋતુથી લોકોમાં પણ ચિંતાનો માહોલ જોવા મળ્યો છે.
Previous post