સનસનાટી ભરેલી ઘટનામાં વાપી ચણોદના ઈકો ચાલક વિજય કુશ્વાહાની પોલીસે અટક કરી
(વર્તમાન પ્રવાહ વાપી બ્યુરો)
વાપી, તા.12 વાપી ચાર રસ્તાથી ઈકો સ્ટેન્ડ ઉપરથી પાલઘર જવા માટે એક મહિલા તેની 10 માસની દિકરી સાથે ઈકોમાં બેસી ગત શનિવારે નિકળી હતી. રસ્તામાં હાઈવે ઉપર મુસાફરો દ્વારા છેડતી અને વિનય ભંગ કરવામાં આવ્યો હતો. પ્રતિકાર બાદ પણ મુસાફરો દ્વારા ચેનચાળા ચાલુ રહેતા મહિલાએ બાળકીને હાઈવે ઉપર ફેંકી પોતે પણ કુદી પડી હતી. ઘટનામાં બાળકીનું મોત નિપજ્યું હતું. પોલીસમાં મામલો પહોંચતા પોલીસે વાપીના ચણોદમાં રહેતા ઈકો કારચાલકની અટક કરી વધુ તપાસ હાથ ધરી છે. બનાવની પ્રાપ્ત વિગતો મુજબ પાલઘર નજીક રહેતી એક મહિલા શનિવારે સવારે વાપી ચાર રસ્તા નજીક ઈકો સ્ટેન્ડ ઉપરથી ઈકો કાર નં.જીજે 15 સીજે 1137માં પોતાની 10 મહિનાની બાળકીને લઈને બેસી હતી. પાછળની સીટે બેઠેલા અજાણ્યા મુસાફરો દ્વારા શારીરિક છેડતી કરવામાં આવતી રહી હતી. ગમે ત્યાં હાથ લગાવી વિનય ભંગની ચેષ્ઠા સતત મુસાફરો દ્વારા ચાલુ રહેતા મહિલાએ બાળકીને ફેંકી પોતે હાઈવે ઉપર કુદી પડી હતી. વાપી આવી મહિલાએ પોલીસને જાણ કરતા પોલીસે ઈકો ચાલક વાપી ચણોદમાં રહેતા વિજય કુશ્વાહાની અટક કરી છે. પરંતુ મહિલા વારંવાર નિવેદનો બદલતી રહેતી હોવાથી પોલીસ પણ અસમંજસમાં પડી રહી છે તેથી પાલઘર પોલીસ અને વાપી પોલીસે ઘટનાની પુરી તપાસ માટે સી.સી.ટી.વી. ફુટેજ તપાસવા શરૂ કર્યા છે. સસ્પેન્સ ઉપજાવતી આ ઘટનામાં તપાસમાં કોઈ નવો વળાંક પણ સંભવતઃ આવી શકે એમ છે.
