પોલીસે બસ ચેકિંગ માટે ઉભી રાખતા જ બસ ચાલક થયો ફરાર
(વર્તમાન પ્રવાહ ન્યુઝ નેટવર્ક)
પારડી, તા.12 આમંત્રણ ટ્રાવેલ્સ નામની લકઝરી બસ નંબર જીજે 14 એક્સ 9966 માં મુંબઈથી પેસેન્જરો બેસાડી ભાવનગર નીકળી હોય અને તેમાં દારૂનો જથ્થો હેરાફેરી થઈ રહી હોવાની બાતમી પારડી પોલીસને મળતા પારડી બગવાડા ને.હા. નં. 48 પર વોચ ગોઠવી હતી. જે દરમિયાન બસ આવતા પોલીસે અટકાવી હતી અનેઆ બસની અંદર તપાસ કરતાં તેનો ચાલક બસ મૂકી ફરાર થઈ ગયો હતો અને ક્લીનર પાસે ડીકી ખોલાવી ચેક કરતા તેમાથી વિદેશી દારૂની બોટલ નંગ 73 જેની કિંમત રૂા.1,46,000/- મુદ્દામાલ મળી આવતા પોલીસે કાર્યવાહી કરવા મુસાફરો સાથે બસ પોલીસ મથકે લઈ આવવા પડી હતી. જેને લઈ બસમાં બેસેલા મુસાફરો અટવાઈ પડ્યા હતા. આ અંગે પોલીસે બસ માલિકનો સંપર્ક કરી મુસાફરો માટે વ્યવસ્થા કરવા જણાવ્યુ હતું અને પારડી પોલીસે રૂા.15,00,000ની બસ અને રૂા.1,46,000નો દારૂ કબજે લઈ ભાગી છૂટેલા બસ ડ્રાઈવર રઘુ ધીરુભાઈ ભાલીયા રહે.ભાવનગર જેસર વિરુધ્ધ ગુન્હો નોંધી પારડી પોલીસે વધુ કાર્યવાહી હાથ ધરી છે.
