સ્ટ્રીટ વેંડરની ચૂંટણીમાં કરોડપતિઓએ પણ નોંધાવેલી પોતાની ઉમેદવારી
(વર્તમાન પ્રવાહ ન્યુઝ નેટવર્ક)
સેલવાસ,તા.15 : સેલવાસ નગર પાલિકા દ્વારા સ્ટ્રીટ વેંડરની ચૂંટણીનું આયોજન કરવાની તૈયારી હાથ ધરવામાં આવી રહી હોવાની માહિતીમળી છે. જે સંદર્ભે એક વેપારી દ્વારા આ ચૂંટણીને રદ્ કરવા માટે જિલ્લા કલેક્ટરશ્રીને લેખિત રજૂઆત કરી છે.
પ્રાપ્ત માહિતી મુજબ સેલવાસ નગરપાલિકા દ્વારા યોજાઈ રહેલી સ્ટ્રીટ વેન્ડરની ચૂંટણીને રદ્ કરવા કિલવણી નાકા નજીક શાકભાજી માર્કેટમાં વેપાર કરનાર વેપારી શ્રી રામ મુરત મોર્યાએ કલેક્ટરશ્રીને કરેલી રજૂઆતમાં જણાવ્યું છે કે, નગરપાલિકા દ્વારા સ્ટ્રીટ વેંડરની ચૂંટણી કરાવવામાં આવી રહી છે પરંતુ જે લોકોને પાલિકા દ્વારા નોટિસ આપવામાં આવેલ છે તેવા લોકો પણ ચૂંટણીમાં ઝંપલાવી રહ્યા છે અને તેઓએ પોતાનું ઉમેદવારી ફોર્મ પણ ભર્યું છે. જેઓએ ફોર્મ ભર્યા છે તેઓ કરોડો રૂપિયાના માલિક છે. એમની પાસે પોતાનો ફલેટ છે, બંગલો છે અને આરસીસી ઘર પણ છે. છતાં પણ ચૂંટણી લડી રહ્યા છે તેઓ આ ચૂંટણી લડી શકે નહીં. કારણ કે, આ ચૂંટણી સ્ટ્રીટ વેંડરની છે. તેથી સૌ પ્રથમ અગાઉ જે નોટિસ આપવામાં આવેલ તે બાબતે તપાસ કરવામાં આવે અને પછી જ આ ચૂંટણી યોજવામાં આવે. જેથી અમે તમામ સ્ટ્રીટ વેંડરો માંગ કરીએ છીએ કે, આ ચૂંટણી રદ્ કરવામાં આવે અને જે નોટિસ અગાઉ આપેલ તેઓની નિષ્પક્ષ તપાસ કરવામાં આવે એ અતિ જરૂરી છે.